Wall Street rimëkëmbet pasi Trump pranon rezultatin e zgjedhjeve
Tregjet e aksioneve në Shtetet e Bashkuara shënuan rimëkëmbje këtë mëngjes, pasi kontratat e së ardhmes për indekset kryesore rikuperuan humbjet e regjistruara në orët e para të tregtimit.
Investitorët po vlerësojnë se çfarë ndikimi mund të ketë fitorja e gjerë e Partisë Demokratike në zgjedhjet afatmesme në tregjet financiare, investimet në inteligjencën artificiale dhe rregullimin e këtij sektori, transmeton Telegrafi.
Megjithatë, një pjesë e humbjeve u rikuperua pasi presidenti Donald Trump deklaroi se e pranon rezultatin e zgjedhjeve dhe pranoi se lufta me Iranin kishte ndikuar në humbjet e republikanëve.
Kontratat e së ardhmes për indeksin Nasdaq 100 ranë deri në 2.4 për qind, ndërsa ato për S&P 500 humbën deri në 1.4 për qind, përpara se të rikuperonin një pjesë të konsiderueshme të rënies.
“Pranimi i rezultatit nga Trump ka ndihmuar në zbutjen e disa shqetësimeve për një përplasje të zgjatur politike dhe bllokim legjislativ, megjithëse kompetenca e tij për të vënë veton nënkupton se mosmarrëveshjet e rëndësishme politike ka të ngjarë të vazhdojnë”, tha Daniela Hathorn, analiste e lartë e tregjeve në Capital.com.
Ndërkohë, investimet në inteligjencën artificiale mbeten në qendër të vëmendjes së investitorëve. Aksionet e kompanive të lidhura me qendrat e të dhënave ranë në tregtimin para hapjes së bursave, pasi ndërtimi dhe zgjerimi i këtyre objekteve u kthye në një çështje të debatueshme gjatë zgjedhjeve në disa shtete amerikane. /Telegrafi/