Zhupa kërkon interpelancë me ministrin Gonxhja: Projekti TID në Durrës kërcënon 70 familje dhe trashëgiminë
Projekti i rikualifikimit urban “TID” në Durrës, i financuar nga qeveria, Bashkia dhe AADF, është vënë në shënjestër të Komisionit Parlamentar për Kulturën. Deputetja e Partisë Demokratike dhe kryetarja e komisionit, Ina Zhupa, depozitoi sot në Kuvend kërkesën për interpelancë me Ministrin e Kulturës, Turizmit dhe Sportit, Blendi Gonxhja.
Zhupa shprehet se ky projekt, ndonëse etiketohet si “rijetëzim turistik”, ka ngritur “shqetësime serioze” për ndikimin e tij social, ligjor dhe kulturor.
Shpronësime dhe mungesë garancish
Problemi kryesor lidhet me fatin e banorëve lokalë. Sipas deputetes, mbi 70 familje, pronarë të ligjshëm, janë futur në një proces shpronësimi me qëllim lirimin e hapësirave për zbatimin e projektit TID.
Zhupa kërkon nga Ministri Gonxhja të japë përgjigje publike për pyetje thelbësore të natyrës kushtetuese dhe ekonomike, të cilat lidhen me:
- Cilat janë garancitë reale për procesin e shpronësimeve dhe dëmshpërblimeve, duke qenë se banorët janë pronarë të ligjshëm?
- Pse ka munguar transparenca dhe konsultimi me komunitetin e prekur nga ky zhvillim?
- Dëmtimi i trashëgimisë dhe ligjshmëria
Sipas saj, përtej shqetësimeve sociale, kërkesa për interpelancë vë në pikëpyetje edhe anën urbanistike dhe atë të trashëgimisë.
Zhupa kërkon të dijë nëse projekti respekton Planin e Përgjithshëm Vendor dhe legjislacionin për trashëgiminë kulturore.
Ajo paralajmëron se ndërhyrja e planifikuar mund të shkaktojë “dëmtimin e strukturës historike dhe sociale të qytetit,” duke vënë në pikëpyetje nëse ndikimi i projektit në turizëm është vërtet real apo thjesht fasadë.
Në fund të statusit të saj, deputetja Zhupa theksoi se prioriteti i saj dhe i Partisë Demokratike është mbrojtja e interesit të qytetarëve, lartësimi i trashëgimisë kulturore dhe promovimi i një turizmi të qëndrueshëm që respekton historinë dhe banorët lokalë.
/rtsh.al/