1 Qershori, sot zhvillohen aktivitete të shumta për fëmijët

Sot shënohet 1 Qershori, Dita e fëmijëve. Në Tiranë dhe në shumë qytete të tjera të Shqipërisë janë planifikuar të zhvillohen aktivitete të shumta kushtuar fëmijëve.
 

Aktivitetet organizohen nga Ministria e Turizmit, Kulturës, Rinisë dhe Sporteve në bashkëpunim me Bashkinë e Tiranës dhe Drejtorinë Arsimore Rajonale të Tiranës si dhe nën kujdesin e Zonjës Liri Berisha.
 

Një koncert festiv për fëmijët do të organizohet në Pallatin e Kongreseve ku do të jetë i pranishëm dhe kryeministri Berisha, ndërsa presidenti Topi do të zhvillojë një pritje me fëmijët në Pallatin e Brigadave.
 

Dita e fëmijëve është vendosur me datën 1 Qershor sepse me këtë datë është mbajtur konferenca botërore e mirëqënies së fëmijëve në Gjenevë në 1925. 1 Qershori e ka origjinën nga Shtetet e Bashkuara dhe Kina. Në vitin 1925 konsulli i përgjithshëm kinez në San Francisko mblodhi së bashku një numër të konsiderueshëm fëmijësh jetim kinezë të celebronin në festivalin e “Anijes së Dragoit”.

Kjo gjë përkoi të ishte në të njëjtën ditë me konferencën në fjalë, por festa e 1 Qershorit filloi të festohet pas dy vitesh. Shumë vende të botës e kanë pranuar atë si festën ndërkombëtare të fëmijëve dhe realizojnë festime të cilat kanë si qëllim të rrisin vëmendjen në drejtim të mirëqenies së tyre.