“Shkurta” e Arzana Krajës shkon në Festivalin Rio de Janeiro

Filmi “Shkurta” i Arzana Krajës, projekt i produksionit Circle Production nga Kosova, i subvencionuar nga Qendra Kinematografike e Kosovës, është zgjedhur në edicionin 22 të Rio de Janeiro International Short Film Festival, në programin zyrtar në kategorinë e Filmit ndërkombëtar, me ç’rast do ta ketë premierën botërore.

Rio de Janeiro International Short Film është festivali më i madh i filmit të shkurtër që i kualifikon fituesit në Akademinë Amerikane të Filmit, Oscar.

Në një njoftim të dërguar nga QKK, bëhet e ditur po ashtu se filmi “Shkurta” do të marrë pjesë edhe në programin zyrtar për kategorinë e filmit të shkurtër në njërin nga festivalet e njohura të filmit në Europë, ku do të shfaqet si premierë europiane, por për shkak të rregullave të Festivalit duhet të pritet publikimi i programit të tyre.

“Shkurta” është një rrëfim i heshtur për Shkurtën, vajzën e pestë të familjes. Ajo dhe babai i saj pasi mbijetojnë luftën përballen me dhimbjen, ndjenjën e fajit dhe moskomunikim mes tyre.

Ky film zgjat 20 min. Skenari dhe regjia është e Arzana Krajës, producent: Besnik Krapi.

Në film luajnë: Kaona Sylejmani Bislim Muçaj. Drejtor i fotografisë është Fitim Shala, kostumografe: Vesa Kraja, kurse montazhi: Faton Hasani.