2 civilë të vrarë dhe 18 të plagosur në sulmin me raketa në Kharkiv

Zyra e Prokurorit të Kharkiv tha të shtunën se dy civilë u vranë dhe 18 u plagosën në një sulm me raketa lundrimi në qytetin verilindor të Ukrainës raporton CNN.

Në një deklaratë, zyra e prokurorit tha se forcat ruse goditën lagjet Slobidskyi dhe Osnoviansky të Kharkiv me një sulm me raketa Kalibr. Ndërtesa banimi, makina, një treg dhe dyqane gjithashtu u dëmtuan ose u shkatërruan, thuhet në deklaratë. 

Oleh Syniehubov, kreu i administratës ushtarake rajonale të Kharkiv, tha se punonjësit e shpëtimit ishin në vendngjarje.

Diku tjetër në rajonin e Kharkiv, Serhii Zelensky, kryebashkiaku i qytetit të Lozova, u bëri thirrje banorëve që të evakuohen menjëherë me tren mes shenjave të një ofensive të shtuar ruse.

“Ajo që kam postuar në rrjetet e mia sociale nuk është false”, u tha ai banorëve. “Kam 10 ditë që po ju kujtoj se ka kërcënime përkatëse. Deri më sot, nuk ka asnjë kërcënim tokësor. Por ekziston mundësia e rritjes së sulmeve me raketa në qytetin tonë. Si dhe bombardimet. Prandaj mos u frikësoni.”

Kryebashkiaku tha se një tren evakuimi për në qytetin e Khmelnytskyi do të jetë i disponueshëm të shtunën pasdite, së bashku me autobusët e evakuimit që do të niseshin për në qytetin e Pavlohrad. 

“Aty do të takoheni”, tha ai. “Pra, mos u frikësoni. Kush të dojë, largohet. Nuk ka kërcënim tokësor. Vetëm — e përsëris — rrezik raketash. Si dhe bombardimet.”