30 vjet në skenë
Grupi gjerman i muzikës punk-rock "Die Toten Hosen" ka një prirje të veçantë për të dhënë koncerte në vende të pazakonta. Atyre u pëlqen të këndojnë në dhomën e ndenjes së fansave të tyre, ose të na surprizojnë me koncerte që japin nëpër burgje. Campino & Co nuk kanë hequr dorë nga ky lloj argëtimi as tani që ka kohë që janë profesionistë.
Ata nuk sillen si starë. Në qytetin e tyre në Dusseldorf, ata mund t'i takosh nëpër ndeshje futbolli, koncerte, apo në ndonjë bar të zakonshëm. Ja si e shpjegon kritiku i muzikës Philip Holstein fenomenin "Die Toten Hosen": "Muzika e tyre vazhdon të jetë punkrock. Ata i kanë mbetur besnik asaj. Dhe sa më gjatë jetoj në Dusseldorf, aq më shumë e kuptoj se sa i rëndësishëm është ky grup për qytetin, po se po, por edhe për të gjithë Gjermaninë."
Grupi "Die Toten Hosen" është i njohur për mesazhet e qarta. Ata angazhohen kundër energjisë bërthamore apo kundër nazistëve, apo pozojnë lakuriq për një fushatë kundër vrasjes së kafshëve për t'u marrë gëzofët.
Meloditë e thjeshta dhe tekstet e lehta për t'u kuptuar pëlqehen shumë. Me tituj të tillë si "Më bli!" apo "Opium për popullin" grupi ka qenë rregullisht në vendet e para të top listave të hiteve në radio. Ky grup i tërheq më magjinë e vet të gjithë brezat.
Shumë shpesh prindërit i marrin me vete fëmijët nëpër koncerte. Unikal është edhe fenomeni i Argjentinës, ku ky grup është prej 20 vjetësh pothuaj po aq popullor sa në Gjermani.
Në qershor këngëtari i këtij grupi, Campino, feston 50-vjetorin dhe megjithë karizmën e tij ai thotë: "Duhet të pranoj se rreth 90 përqind e të gjitha përvojave të jetës sime që do t'i quaja ‘cool’ apo ‘super’ janë të lidhura me grupin "Die Toten Hosen".
Se sa do të vazhdojë karriera e këtij grupi nuk dihet. Por një gjë dihet tashme, në një nga varrezat e Dusseldorfit pesëshja ka rezervuar një varr të përbashkët.