50 vjet nga krijimi i James Bond

Me rastin e 50-vjetorit të krijimit të personazhit të famshëm të botës së spiunazhit, James Bond, Metro Goldwyn Mayer dhe Twentieth Century Fox kanë njoftuar daljen në vjeshtë të “Bond 50”.

Bëhet fjalë për një paketë ku përfshihen të 22 filmat me spiunin më të famshëm në botë, që vijnë në format DVD Blu-ray, për herë të parë të gjithë së bashku.

Gjithashtu, paketa e filmave me protagonist agjentin 007, me licencë për të vrarë, ka si risi cilësinë 'high definition' për 9 prej 22 prodhimeve kinematografike.

“Të kesh të 22 filmat në dispozicion në Blu-ray për herë të parë është një mundësi e madhe për fansat e agjentit sekret më të famshëm të kinemasë, të cilët do të mund të përjetojnë sërish aventurat epike të tij, para daljes së episodit të fundit “Skyfall” vjeshtën e ardhshme”, ka deklaruar Michael Brown, zëvendëspresident i MGM.

Sipas tij, tani spektatorët do të kenë mundësi të shijojnë të gjithë intensitetin e aksionit, duke eksperimentuar cilësinë më të mirë të mundshme.

Agjenti i famshëm, i krijuar nga pena e Ian Fleming, është interpretuar në këto 50 vjet nga gjashtë aktorë: Sean Connery, Roger Moore, George Lazenby, Timothy Dalton, Pierce Brosnan dhe së fundmi Daniel Craig, që është dhe Bondi i parë me flokë të verdhë.