APPLE VJEN ME IPHONE ULTRA

Apple pritet të prezantojë më 9 shtator iPhone Ultra, modelin e parë të palosshëm të kompanisë, duke hyrë zyrtarisht në një treg ku dominojnë Samsung dhe prodhues të tjerë. Pajisja pritet të dalë në shitje deri në fund të vitit dhe të kushtojë deri në 3 mijë euro, në varësi të konfigurimit. Në të njëjtin event pritet të prezantohen edhe produkte të tjera të Apple, ndërsa kompania po përgatitet edhe për ndryshimin e drejtimit ekzekutiv.

Apple pritet të prezantojë më 9 shtator iPhone Ultra, modelin e parë të palosshëm të kompanisë, i cili pritet të dalë në shitje deri në fund të vitit.

Pajisja shënon hyrjen e Apple në tregun e telefonave të palosshëm, ku aktualisht dominojnë kompani si Samsung, ndërsa alternativa ofrohen edhe nga Huawei, Google dhe Motorola.

Sipas informacioneve të publikuara, iPhone Ultra do të ketë dy ekrane: një ekran të brendshëm rreth 19.8 centimetra, i cili hapet si libër dhe një ekran të jashtëm 13.5 centimetra për përdorim të zakonshëm si smartphone. Telefoni pritet të ketë gjithashtu 4 kamera:2 në pjesën e pasme, 1 në pjesën e brendshme dhe 1 kamerë selfie në pjesën e përparme.

Modeli i ri pritet të pajiset me procesorin A20 Pro, i cili do të jetë rreth 18 për qind më i shpejtë dhe do të përdorë 30 për qind më pak energji krahasuar me A19 Pro.

Një tjetër veçori e përfolur është dizajni me kënde asimetrike, bazuar në imazhet e mbrojtëseve të ekranit të publikuara më herët gjatë vitit.

Hyrja e Apple në këtë treg pritet të ketë ndikim të madh, pasi analistët besojnë se kompania mund të fitojë shpejt një pjesë të konsiderueshme të tregut. International Data Corporation parashikon se Apple mund të shesë më shumë se 10 milionë njësi gjatë vitit të parë.

Çmimi pritet të variojë nga 2,200 deri në 2,500 euro për versionin bazë dhe nga 2,600 deri në 3,000 euro për modelet me më shumë hapësirë ruajtjeje.

Prezantimi do të jetë një moment i rëndësishëm edhe për John Ternus, ish-nënkryetar i lartë i inxhinierisë së pajisjeve, i cili do të marrë zyrtarisht detyrën e CEO-së nga Tim Cook më 1 shtator.

Në të njëjtin event pritet të prezantohen edhe Apple Watch Series 12, Apple Watch Ultra, iPad mini 8 dhe AirPods Pro, si dhe përditësime për Apple TV dhe HomePod mini.