Ahmeti: Një Dejton dhe Rambuje për zgjidhjen e emrit

Gjatë konferencës kushtuar dhjetë vjetorit të Marrëveshjes së Ohrit, lideri i BDI-së, Ali Ahmeti ka propozuar një zgjidhje të re për kontestin e emrit me Greqinë.

Propozimi i Ahmetit ishte që një grup ndërkombëtar të ndihmojë në zgjidhjen e çështjes së emrit.

Në fjalimin e tij në Ohër, ai tregoi se mbyllja e kontestit të emrit është çështje kyçe jo vetëm për stabilitetin e Maqedonisë por edhe të Ballkanit.

“Hapi i fundit për të siguruar paqe jo vetëm në Maqedoni por edhe në rajon, do të ishte një ndihmë e përforcuar ndërkombëtare në zgjidhjen e problemit me emrin. Më së miri për këtë do të ishte të formohet një grup, selia e të cilit nuk do të ishte në Nju Jork, por që do të vepronte këtu, në rajon. Do të doja ky grup të funksiononte brenda, ashtu siç funksionoi grupi i Ahtisarit, grupet të krijuan Rambujen dhe Dejtonin, dhe përmes një angazhimi të përforcuar në fund të arrihet paqja, dhe vendi im të anëtarësohet në NATO dhe Bashkim Evropian”, është shprehur Ahmeti.