Akademia e Policisë, testimi më 10 korrik

Policia e Shtetit lajmëron aplikantët për procedurat e testimit për të fituar të drejtën e studimit në Akademi

Dokumentet që duhet të kenë me vete aplikantët. Mbi 1 mijë konkurrues për 150 vende

TIRANË- Kandidatët që kanë aplikuar për të ndjekur studimet për “Patrullën e Përgjithshme” pranë Akademisë së Policisë “Arben Zylyftari” në Tiranë, do të përballen me testimin me shkrim më datë 10 korrik. Policia e Shtetit bëri të ditur dje se më datën 10 korrik do të zhvillohet testimi me shkrim për 1.049 kandidatë që kanë aplikuar për të ndjekur studimet në Akademinë e Policisë, ku vetëm 150 prej tyre do të kualifikohen. “Testimi do të zhvillohet në ambientet e Pallatit të Kongreseve në Tiranë. Kandidatët duhet të paraqiten në orën 07.30 të datës 10 korrik dhe duhet të kenë me vete fletën e pranimit në testin me shkrim, dokument i cili u është dhënë në momentin e regjistrimit nga zyrat e personelit të drejtorive të policisë në qarqe”,- thuhej në deklaratën e policisë së shtetit lëshuar ditën e djeshme.

Testimi

Kandidatët për të studiuar në Akademinë e Policisëduhet të kenë me vete, ditën e testimit me shkrim kodin e aplikimit, i cili do të përdoret si numër identifikimi. “Kandidatët duhet të paraqiten në Drejtoritë e Policisë në Qarqe, ku kanë bërë regjistrimin për të marrë Kodin e Aplikimit, i cili do të përdoret si numër identifikimi gjatë konkursit. Listat me kodin e aplikimit do të afishohen pranë të gjitha drejtorive të policisë. Pretendentët për studentë në akademinë e policisë do të përballen me testin me shkrim , i cili do të jetë i ndërtuar kryesisht në formën e pyetjeve me përgjigje alternative. Korrigjimi i testit do të realizohet me skaner, duke mundësuar përcaktimin e kandidatëve fitues brenda ditës dhe në prani të kandidatëve”,- thuhej në deklaratën e Policisë së Shtetit.

Fituesit

Fituesit e testimeve do t’i nënshtrohen një trajnimi policor bazë 20 javor, pranë Akademisë së Policisë "Arben Zylyftari". Gjatë trajnimit bazë policor, aplikantët do të trajnohen për të përmbushur të gjitha detyrat e një punonjësi policie, duke përfshirë patrullimin parandalues, hetimin paraprak të krimeve, kontrollin dhe zbatimin e rregullave të qarkullimit rrugor, policimin në komunitet dhe zbatimin e strategjive bashkëkohore të zbatimit të ligjit. Ky trajnim do të ndiqet nga një trajnim 20-javor në terren gjatë të cilit punonjësit e policisë do të zhvillojnë dhe përmirësojnë aftësitë e marra në shkollën policore. Pasi do të punojnë në “Patrullën e Përgjithshme” për dy vite të detyrueshme, ata do të kenë mundësi për të konkurruar për t'u ngritur deri në gradat më të larta të Policisë së Shtetit.