Aksioni kundër ndërtimeve pa leje, Koçiu: Shkelësit në “Listën e zezë”, nuk do të marrin leje të reja ndërtimi, konfiskim objekteve për interes publik ose strehim social

Operacioni i nisur kundër ndërtimeve pa leje dhe tejkalimit të lejeve të miratuara po intensifikohet në gjithë vendin, me Ministren e Punëve të Brendshme, Albana Koçiu, që ka paralajmëruar masa drastike dhe të pakthyeshme, duke përfshirë krijimin e një “liste të zezë” për subjektet shkelëse.

Ministrja Koçiu, së bashku me Kryeinspektoren e IKMT-së, Dallëndyshe Bici, dhe Nënkryetarin e Bashkisë së Tiranës, Blendi Sulaj, ndoqën sot nga afër inspektimet në zonën e Farkës, ku u konstatuan objektiva që kishin tejkaluar ndjeshëm sipërfaqet e lejuara të ndërtimit.

Në një prononcim, Ministrja Koçiu theksoi se ndryshimet ligjore të miratuara së fundmi nuk lënë asnjë hapësirë për interpretime, duke i vënë barrën e zbatimit plotësisht ndërtuesve.

“Ndërtuesit, projektuesit dhe çdo palë e përfshirë kanë një detyrim të vetëm: zbatimin e plotë të ligjit,” tha ajo, duke shtuar se aksioni nuk do të jetë i përkohshëm, por një operacion i pandalshëm për vendosjen e rregullit dhe standardit në territor.

Gjatë inspektimeve të deritanishme, të nisura në fillim të nëntorit, janë evidentuar një sërë shkeljesh.

Këto variojnë nga mungesa e dokumentacionit teknik dhe moszbatimi i planeve të kantierit, deri te tejkalimi flagrant i lejeve të ndërtimit me shtesa në sipërfaqe.

Masat nga prishja te konfiskimi i objekteve

Për të gjitha rastet e konstatuara, Ministrja Koçiu bëri të qarta masat e menjëhershme dhe të paracaktuara në ligj, të cilat do të kenë një ndikim afatgjatë në tregun e ndërtimit.

Ajo theksoi tri masa kryesore:

Lista e zezë

Vendosja e subjekteve shkelëse në listën e zezë, duke u pamundësuar marrjen e lejeve të reja të ndërtimit.

Kjo masë synon të ndëshkojë praktikisht përgjegjësit e shkeljeve duke i nxjerrë jashtë tregut për një periudhë të pacaktuar.

Kostot

Detyrimi që të gjitha kostot e prishjes së objekteve pa leje t’i paguajë subjekti përgjegjës.

Konfiskimi

Konfiskimi i objektit për interes publik ose për strehim social, kur parashikohet nga ligji.”

Përgjegjësia Institucionale

Në fund, kreu i MPB-së hodhi dritë mbi përgjegjësinë e autoriteteve, duke paralajmëruar se aksioni do të përfshijë edhe brenda radhëve të administratës.

“Askush nuk do të tolerohet. Do të ndëshkohet çdo shkelje, duke përfshirë edhe rastet kur autoritetet lokale ose funksionarë publikë implikohen apo mbyllin sytë ndaj paligjshmërisë,” përfundoi Ministrja Koçiu.

Operacionet e kontrollit dhe ndërhyrjes ndaj veprimtarisë së ndërtimeve pa leje kanë nisur në fillim të nëntorit në gjithë vendin dhe do të vijojnë pa ndërprerje, duke sinjalizuar një epokë të re të zbatimit rigoroz të ligjit në territor.

/rtsh.al/