Aksioni në kryeqytet Urdhër mbrojtje për 4 fëmijë që lypin

Katër fëmijë largohen nga rruga dhe dërgohen në qendra rehabilitimi. Dy javë pas urdhrit të përbashkët të Ministrisë së Punës dhe asaj të Brendshme, kanë nisur të merren masat e para. Të dhënat u raportuan dje, në mbledhjen e Këshillit Kombëtar të Mbrojtjes së të Drejtave të Fëmijëve.
“Janë katër raste të identifikuara që kanë marrë urdhrin e mbrojtjes. Ata janë sistemuar pranë institucionit të përkujdesit social për viktimat e dhunës. Është një rast që është referuar si viktimë e mundshme trafikimi dhe është referuar pranë Qendrës Kombëtare pritëse të viktimave të trafikimit”, tha Matilda Tyli, nga Drejtoria e Politikave të Shërbimeve Sociale.
Të pranishëm në këtë mbledhje ishin përfaqësues të ministrive të linjës, si dhe të shoqërisë civile. “Tashmë ka filluar aksioni i përbashkët në Tiranë, i cili do të shtrihet në të gjithë vendin, për heqjen e fëmijëve nga rruga dhe në bashkëpunim me njësitë për mbrojtjen e fëmijëve pranë bashkive dhe komunave, këtyre fëmijëve do t’u ofrohet e gjithë mbështetja e nevojshme”, tha ministri i Punës, Spiro Ksera.