Aktakuzat ndaj Limajt, shtabi i UÇK-së dëshmitar

Fatmir Limaj ka zgjedhur të dëshmojë pafajësinë e tij, duke dërguar në gjykatë të gjithë anëtarët e ish-shtabit të Ushtrisë Çlirimtare të Kosovës.

E përditshmja “Koha Ditore”, shkruan se Limaj, një ditë pasi Prokuroria Speciale e Kosovës, ka ngritur aktakuzën kundër tij për krime lufte, ai ka nisur të përgatisë mbrojtjen në Gjykatë, duke thirrur në proces gjyqësor ish-bashkëluftëtarët.

Prokuroria ka ngarkuar deputetin Fatmir Limaj me 5 pika të aktakuzës. Prokurori italian Maorizio Salustro ka ngritur aktakuzë kundër Limajt për krime lufte kundër të burgosurve të luftës.

Mbi nënkryetarin e Partisë Demokratike të Kosovës (PDK-së) rëndojnë pesë pika të aktakuzës, dy për krime lufte kundër popullatës civile dhe tri pika për krime lufte kundër të burgosurve të luftës, që përfshin edhe vrasjen.