Amnistia, nis greva e urisë nëpër burgje

Në disa burgje të vendit si në Shënkoll të Lezhës, në Fushë- Krujë, por edhe në Peqin, të burgosurit kanë nisur një grevë urie në lidhje me amnistinë që do miratohet së shpejti nga parlamenti.

Të burgosurit kanë refuzuar ushqimin ditën e djeshme duke kërkuar plotësimin e dy kërkesave të tyre.

Mësohet se të burgosurit kërkojnë që në amnisti të përfshihet ulja e dënimit me një të katërtën për të gjithë të burgosurit.

Po ashtu ata kërkojnë që të ketë ndryshime në Kodin Penal, duke parashikuar me ligj të drejtën e lirimit me kusht pasi personi ka kryer tre të katërtat e dënimit të tij.

Amnistia e parashikuar nga qeveria përfshin ata që kanë kryer vepra të lehta penale. Qeveria parashikon se kjo amnisti do të ulë shpenzime në burgje me 1.5 milion euro.