Anuela Ristani lë detyrën e kryetares së komanduar nga Bashkia e Tiranës pas revokimit të kompetencave nga Veliaj

Nënkryetarja e Bashkisë së Tiranës, Anuela Ristani, ka njoftuar se ka lënë detyrën e kryetares së komanduar nga Bashkia e Tiranës, përmes një postimi në rrjetet sociale. Përmes një mesazhi publik, Ristani shprehu mirënjohjen për përvojën 11-vjeçare në menaxhimin e kryeqytetit, duke nëvizuar transformimin e Tiranës gjatë kësaj dekade dhe duke u larguar, siç u shpreh ajo, “me krenari, përulësi dhe plot dashuri për qytetin”.

“Pas më shumë se një dekade në shërbim të qytetit më të bukur në botë, largohem sot me krenari, përulësi dhe plot dashuri për Tiranën. Atë që të gjithë e lakmojnë, shumë e duan, por pak e kuptojnë. Qyteti për të cilin fillova të punoj 11 vite më parë, kur kaloja distancën e shkurtër por të gjatë të sheshit “Skënderbej“ që vetëm shesh nuk mund të quhej, është sot pikë takimi për vizitorë nga e gjithë bota, që nuk dinë t’i vënë tamam një emër joshjes që ndjejnë, pasi pika më e fortë e Tiranës është ndjesia e mirë që të jep. Jam pa masë mirënjohëse për të gjithë bashkëudhëtarët e kësaj përvoje të papërsëritshme, dhe për qytetarët që thyen paragjykime shekullore dhe stereotipe brezash për t’u shfaqur të bukur dhe krenarë në të gjithë botën. Koha është gjykatësi më i drejtë, më i paanshëm dhe më i pakapshëm. Në respekt të kohës, asaj që do të vijë, lipset që qytetin ta shohim pak më tonin e ta duam për atë që jemi, jo për atë që mund të na bëjë. Dhe sa për mua, unë do të mbetem gjithmonë “xhomllikse” edhe pse kam lindur në Tiranë të Re dhe jam rritur përtej oqeanit. Largohem sot me mbështetjen dhe dashurinë e atyre që për mua kanë më shumë rëndësi. Faleminderit të gjithëve! A.”, ka shkruar Ristani.

/rtsh.al/