Arrestohet 57-vjeçari në Vlorë, mbante të fshehura armë dhe eksplozivë! Dyshohet se i shërbente grupit kriminal

Sektori për Hetimin e Krimeve të Rënda dhe Seksioni për Mbështetjen Operacionale të Hetimit në DVP Vlorë finalizuan me sukses operacionin policor të koduar “Explosion”. Falë ndërhyrjes operative, u bë e mundur sekuestrimi i 3 armëve zjarri dhe një sasie lënde eksplozive plastike të ndarë në 10 kallëpe, të cilat dyshohet se ishin destinuar për grupe kriminale.

Operacioni u zhvillua në fshatin Gorrisht, Selenicë, ku u arrestua në flagrancë shtetasi Xh. S., 57 vjeç, banues në këtë zonë. Gjatë kontrollit të ushtruar në banesën e tij, policia gjeti dhe sekuestroi armët dhe lëndën eksplozive plastike të fshehura në një çantë.

Hetimet e mëtejshme kanë ngritur dyshime se armët dhe lënda eksplozive mund të ishin mbajtur nga 57-vjeçari për grupe kriminale, me qëllim përdorimin në aktivitete të paligjshme. Prokuroria po vijon hetimet për të identifikuar dhe ndaluar individët e tjerë të përfshirë në këtë veprimtari kriminale.

Materialet procedurale iu kaluan Prokurorisë për veprime të mëtejshme.