BE trondit FIFA-n

FIFA dhe UEFA mund ta humbasin një nga betejat e tyre të mëdha. Një propozim ka ardhur nga Bashkimi Europian dhe bëhet fjalë për transmetim pa pagesë të ndeshjeve finale të kampionateve botërore dhe europiane.
Propozimi ka ardhur nga avokati i përgjithshëm i Gjykatës Europiane, Nilo Jaskelainen, ndërsa këto ndeshje finale janë quajtur të një rëndësie të madhe për shoqëritë njerëzore në vendet e Bashkimit Europian.
Fillimisht, dy shtete si Belgjika dhe Britania e Madhe paraqitën propozimet e tyre që gjetën miratim në Komisionin Europian duke e quajtur si pjesë e të drejtave të njeriut.
FIFA dhe UEFA reaguan menjëherë duke dërguar në Gjykatë vendimet e Komisionit, ndërsa të drejtat televizive të finaleve të Botërorëve dhe Europianëve përbëjnë një përqindje të rëndësishme të të ardhurave për dy shoqatat drejtuese të futbollit.
Juridikisht, mendimi i Avokatit të Përgjithshëm të Gjykatës Europiane nuk ka vlerë vendimmarrëse, por në 80 për qind të rasteve, gjykata ka dhënë vendimet e saj në përputhje me të.
Pra, FIFA dhe UEFA rrezikojnë shumë, ndërsa popullsia në vendet e Bashkimit Europian me shumë gjasa do të ketë mundësi të ndjekë pa pagesë ndeshje nga më spektakolaret në botë, ato të finaleve të turneve të mëdhenj.