BERLIN – Baerbock mbështet masën e SHBA-së për të lejuar Ukrainën të përdore raketat me rreze të gjatë
BERLIN, 18 nëntor /ATSH-DPA/- Ministrja e Jashtme gjermane Annalena Baerbock ka shprehur miratimin e raporteve se presidenti amerikan Joe Biden po lejon Ukrainën të përdorë raketa me rreze të gjatë veprimi kundër objektivave specifike në Rusi.
Duke folur për transmetuesin gjerman rbb Inforadio, Baerbock theksoi rëndësinë e mundësimit të Ukrainës që të neutralizojë kërcënimet në burimin e tyre.
“Ukrainasit nuk duhet të presin që raketat të kalojnë kufirin – ata duhet të jenë në gjendje të shkatërrojnë drejtpërdrejt vendet e lëshimit të raketave”, tha Baerbock, duke përmendur parimin e vetëmbrojtjes.
Baerbock, nga të Gjelbrit, tha se partia e saj lidhet me partnerët e Evropës Lindore, si dhe me qeverinë britanike, franceze dhe amerikane në këtë qëndrim.
Partia Socialdemokratike e kancelarit gjerman Olaf Scholz ka hezituar t’i japë Kievit armë për t’u mundësuar forcave ukrainase të godasin thellë në territorin rus.
Ajo theksoi sfidat unike me të cilat përballet Ukraina, ku afërsia me kufirin rus shpesh e bën mbrojtjen ajrore joefektive për shkak të ndikimit të shpejtë të raketave.
Raportet e medieve sugjerojnë se presidenti Biden ka miratuar përdorimin e raketave ATACMS nga Ukraina për të mbrojtur forcat e saj, veçanërisht në rajonin e Kurskut, i cili është pjesërisht i pushtuar nga trupat ukrainase.
Ndërsa Pentagoni dhe Këshilli i Sigurisë Kombëtare nuk pranuan të komentojnë, ata nuk i kanë mohuar raportet.//a.i/