BERLIN – Pistorius: 5% e PBB-së për mbrojtjen është e papërballueshme
BERLIN, 3 shkurt /ATSH-DPA/ – Kërkesat e presidentit amerikan, Donald Trump që anëtarët e NATO-s të shpenzojnë 5% të Prodhimit të Brendshëm Bruto (PBB) për mbrojtjen janë të papërballueshme, deklaroi sot ministri gjerman i Mbrojtjes, Boris Pistorius.
“Ne nuk duhet të hidhemi në lumë nëse këtë na e kërkon Donald Trump”, i tha Pistorius transmetuesit publik gjerman ZDF.
”Megjithatë, Europa duhet të jetë e përgatitur të shkojë përtej objektivit aktual të NATO-s për të shpenzuar 2% të PBB-së për mbrojtjen, në përgjigje të provokimeve të presidentit rus, Vladimir Putin”, u shpreh ministri.
“Duke pasur parasysh kërcënimin e ri që sjell Putini, është krejtësisht e qartë se 2% nuk mund të jetë e mjaftueshme. Duhet të jetë shumë më tepër”, shtoi ai.
Udhëheqësit e BE do të mblidhen sot në Bruksel për të diskutuar politikën e mbrojtjes, me kryeministrin britanik Keir Starmer dhe sekretarin e përgjithshëm të NATO-s Mark Rutte të pranishëm gjithashtu.
Komentet e ministrit gjerman vijnë pasi Rutte i bëri thirrje Gjermanisë që të zgjerojë shpenzimet e saj ushtarake.
“Ne duhet të përgatitemi për luftë. Kjo është mënyra më e mirë për të shmangur luftën”, i tha Rutte tabloidit gjerman ”Bild”./ /i.s/