BOTËRORI 2026 – Kur pasioni dhe puna krijojnë ”Trionda”-n
ISLAMABAD, 29 qershor /ATSH/ – Në zemër të qytetit pakistanez, Sialkot, një vend i njohur për mjeshtërinë në prodhimin e topave të futbollit, lindi një histori frymëzuese suksesi.
Kjo histori ka në qendër Khawaja Masood Akhtar, një inxhinier civil i cili nuk kishte asnjë lidhje me futbollin kur filloi karrierën e tij, sipas “Gulf News”.
Ai punonte për hekurudhat pakistaneze dhe nuk e imagjinonte kurrë se një ditë do të bëhej një nga njerëzit më të rëndësishëm në industrinë botërore të futbollit.
Në vitin 1991, me vetëm një dhomë të vogël dhe 20 punonjës, Akhtar themeloi kompaninë “Forward Sports”.
Fillimet ishin të vështira dhe plot pasiguri.
Kompania prodhonte vetëm një numër të vogël topash në muaj dhe përballej me konkurrencë të fortë.
Megjithatë, ai nuk u dorëzua.
Me shumë punë, këmbëngulje dhe besim te ëndrra e tij, vazhdoi të ecë përpara edhe kur rruga dukej e pamundur.
Një pikë kthese erdhi në vitin 1994, kur kompania filloi bashkëpunimin me ”Adidas”.
Ky bashkëpunim i hapi dyert e tregut ndërkombëtar dhe e ndihmoi kompaninë të rritej me ritme të shpejta.
Nga një biznes i vogël lokal, “Forward Sports” u shndërrua në një nga prodhuesit më të mëdhenj të topave të futbollit në botë.
Sot kompania prodhon miliona topa çdo vit dhe është krenaria e një qyteti të tërë.
Ajo që e bën këtë histori edhe më të veçantë është fakti se topat e përdorur në Kupat e Botës prodhohen pikërisht në Sialkot.
Që nga viti 1982, topat zyrtarë të këtij turneu prestigjioz janë krijuar në këtë qytet.
Për Kupën e Botës 2026, çdo gol, çdo pritje e portierit dhe çdo moment historik realizohet me topin “Trionda” i prodhuar nga kompania e Akhtarit.
Kjo është një arritje që pak njerëz mund ta imagjinojnë.
Një rol të rëndësishëm në këtë sukses kanë edhe gratë që punojnë në fabrikë.
Me duart e tyre ato qepin, kontrollojnë dhe përgatisin topat që më pas përdoren nga futbollistët më të mirë të planetit.
Kompania ka investuar në kushte më të mira pune, transport dhe mbështetje për to, duke u dhënë mundësinë të tregojnë aftësitë e tyre dhe të kontribuojnë në një histori globale suksesi.
Historia e Khawaja Masood Akhtar është një dëshmi se ëndrrat mund të bëhen realitet pavarësisht vështirësive.
Nga një njeri që nuk kishte përvojë në futboll, ai u bë personi që vendosi emrin e Pakistanit në qendër të ngjarjes më të madhe sportive në botë./ /Ad.Ab./ a.jor.