BRUKSEL – Negociatat për anëtarësimin e Ukrainës dhe Moldavisë në BE nisin më 25 qershor
BRUKSEL, 21 qershor /ATSH-DPA/- Negociatat për anëtarësimin e Ukrainës dhe Moldavisë në Bashkimin Evropian do të fillojnë të martën, më 25 qershor, njoftoi sot qeveria belge.
Belgjika, e cila vepron në emër të vendeve anëtare të BE-së deri në fund të këtij muaji, tha në X se ministrat kishin miratuar planet e negociatave për bisedimet me të dy vendet, duke lejuar që negociatat të fillonin javën e ardhshme.
Ukraina dhe Moldavia aplikuan për anëtarësim në BE pas pushtimit të plotë të Rusisë në shkurt 2022.
Por, fillimi i bisedimeve nuk do të thotë që të dy vendet do t’i bashkohen BE-së së shpejti – çdo hap i procesit kërkon marrëveshje unanime midis vendeve anëtare aktuale dhe disa vende të tjera kanë pritur shumë më gjatë.
Udhëheqësit e BE-së njohën zyrtarisht Ukrainën dhe Moldavinë si kandidatë për anëtarësim një vit më parë, në qershor 2023.
Ata i dhanë Gjeorgjisë statusin e kandidatit në dhjetor 2023, në të njëjtën kohë kur ranë dakord për hapjen e bisedimeve me Ukrainën dhe Moldavinë.
Kandidatët e tjerë zyrtarë janë Shqipëria, Bosnjë-Hercegovina, Kosova, Mali i Zi, Maqedonia e Veriut, Serbia dhe Turqia.
Vendi i fundit që u pranua në BE ishte Kroacia, e cila u bashkua në 2013. Rumania dhe Bullgaria u bashkuan në 2007 dhe 10 vende u bashkuan në 2004. //a.i/