Balla pret Wisner: SHBA, mbështetje Shqipërisë në sfidat e sigurisë publike

TIRANË, 26 korrik /ATSH/ Ministri i Brendshëm, Taulant Balla priti sot në takim të Ngarkuarin me Punë në Ambasadën e SHBA në Tiranë, David Wisner me rastin e përfundimit të misionit në vendin tonë.

Balla e falënderoi Wisner për bashkëpunimin e shkëlqyer dhe mbështetjen amerikane në forcimin e kapaciteteve të vendit tonë në sfidat e sigurisë publike, në luftën kundër krimit të organizuar dhe korrupsionit, kundër narkotikëve dhe kundër trafikut të qenieve njerëzore.

Balla u shpreh mirënjohës për programet e asistencës dhe mbështetjen përmes ICITAP, DEA, INL etj., për Policinë e Shtetit dhe Agjencinë e Mbikëqyrjes Policore.

“Bashkë me SHBA jemi pjesë e Koalicionit Global ndaj kërcënimit të Drogave Sintetike, për të koordinuar masa konkrete kundër prodhimit, trafikimit dhe shitjes së tyre tek të rinjtë dhe përdorues të tjerë”, theksoi Balla.