Banda e Lushnjës, prokuroria kundërshton vendimin e Apelit

Organi i akuzës është në pritje të vendimit të zbardhur për të çuar çështjen në Gjykatën e Lartë. Dy ditë më parë Apeli i Krimeve të Rënda i dha pafajësi një të dënuari me 18 vjet burg për vrasje

Tiranë Vendimi i Gjykatës së Apelit për Krime të Rënda, për të liruar të pandehurit e “Bandës së Lushnjës” nga akuza e vrasjes së shtetasit shqiptaro-maqedonas Xhevat Demiri, ka sjellë reagimin e prokurorisë. Burime të Rezervuara pohojnë se Prokuroria e Apelit është në pritje të vendimit të zbardhur të gjykatës, për ta çuar këtë çështje në Gjykatën e Lartë. Arsyetimi i përdorur nga trupit gjykues i përbërë nga katër anëtarë të Gjykatës së Apelit Shkodër dhe një gjyqtar i Krimeve të Rënda, sipas burimeve, do të shërbejë për hartimin e një ankimi të plotë. Paraprakisht mësohet se pjesa më e kontestuar nga ana e prokurorisë është heqja e akuzës së vrasjes të biznesmenit shqiptaro-maqedonas Xhevat Demiri. Si pasojë e pushimit të akuzës, dy ditë më parë fitoi lirinë i pandehuri i “Bandës së Lushnjës”, Afrim Hoxha, i cili ishte dënuar me 18 vjet burg nga Shkalla e Parë. Për këtë çështje prokuroria ka në dorë dy prova, që sipas saj janë thelbësore në zbardhjen e vrasjes së ndodhur në gusht të vitit 1997. Provat, sipas burimeve, kanë të bëjnë me dy dëshmi që janë dhënë në prokurori dhe gjykatë nga dy dëshmitarë okularë në vrasjen e Xhevat Demirit. Dëshmitarja e parë është bashkëshortja e viktimës, e cila ditën e ngjarjes ndodhej në furgon së bashku me viktimën dhe fëmijët e tyre. Dëshmitarja pohon se në hyrje të qytetit të Lushnjës, furgoni me të cilin ata udhëtonin është ndaluar nga katër persona të armatosur dhe pa maskuar, të cilët i ka identifikuar si shtetasit: Afrim Hoxha, Ilir Stergu, Enver Dondollaku dhe Aldo Bare. Bashkëshortja e viktimës, e cila është marrë në mbrojtje nga struktura e Mbrojtjes së Dëshmitarëve, gjithashtu ka treguar me detaje ekzekutimin e të shoqit para syve të saj. Të njëjtën dëshmi ka dhënë edhe dëshmitari tjetër okular i ngjarjes, i cili gjithashtu është në mbrojtje nga organet e specializuar. A. K., shoferi i furgonit jep të njëjtin version si bashkëshortja e viktimës, për vrasjen e Xhevat Demirit. Por pavarësisht këtyre dëshmive, Gjykata e Apelit ka pushuar akuzën e vrasjes ndaj të pandehurve të “Bandës së Lushnjës”, duke i dhënë kështu pafajësi Afrim Hoxhës, i cili për këtë ngjarje është dënuar me 18 vjet burg nga Shkalla e parë. Gjithashtu të pandehurit e tjerë kanë pasur lehtësi në masën e dënimit, pasi njërit prej tyre i është hequr edhe akuza e grabitjes me armë. Edhe kjo dispozitë e vendimit do të kundërshtohet nga Prokuroria, e cila është në pritje të vendimit të zbardhur të Shkallës së Dytë të gjyqësorit. Dy ditë më parë, Apeli i Krimeve të Rënda hoqi disa nga akuzat për grupin e dytë të të akuzuarve si pjesëtarë të “Bandës së Lushnjës”. Arben Boriçi, Ilir Stergu, Afrim Hoxha, Erion Cici, Arjan Aliço, Jorgo Muzaka dhe Rexhep Gina u akuzuan në Prokuroria për Krime të Rënda për të paktën pesë vrasje të kryera si pjesëmarrës në organizatë kriminale. Gjykata e Krimeve të Rënda dënoi me burgim të përjetshëm Arben Boriçin dhe Ilir Stergun, ndërsa dha masa të ashpra dënimi edhe për të pandehurit e tjerë. Sipas prokurorisë, Arben Boriçi, një nga eksponentët kryesor të “Bandës së Lushnjës”, akuzohet se ka vrarë në bashkëpunim me disa nga anëtarët e tjerë të bandës shtetasit Xhevat Demirin, Nimet Zenelin, Masar Aliun, Idajet Beqirin dhe Luan Bilbilin, pas hasmërive që lindën mes grupit të Aldo Bares dhe rivalëve të tij.

L. Bakillari