Basha: Jemi të vetmit me fuqinë e përvojën për ta çuar deri në fund betejën për ndryshim!

Kryetari në detyrë i PD, Lulzim Basha dhe kandidat për kryetar i PD, i ka kërkuar anëtarësisë të vazhdojnë së bashku këtë përballjen me maxhorancën socialiste .”Me përgjegjësinë më të madhe që na kanë ngarkuar shqiptarët përkundër të gjithë kushteve të betejës së 25 prillit, jam këtu t’ju kërkoj të vazhdojmë së bashku këtë përballje.” u tha zoti Basha përkrahësve të tij në Berat. “Unë e di që ju e doni Partinë Demokratike të jetë e bashkuar dhe e fortë dhe ju garantoj që ky është dhe prioriteti im i parë dhe kryesor që nga kjo garë, nga ky proces i brendshëm të dalim të bashkuar dhe të fortë.” tha ai. “Më 25 prill pavarësisht të gjithë makinacioneve dolëm më të fortë, më të mëdhenj, më të bashkuar dhe padiskutim për këtë merita i takon në radhë të parë mbi të gjitha demokratëve” tha zoti Basha. 
“Shqiptarët na ndoqën sepse e besuan që ne po e bënim këtë për ta, këtë betejë po e bënim për Ta, të vetëdijshëm që ne ishim e vetmja fuqi që  mund t’i kundërviheshim regjimit. Dhe  shqiptarët kam bindjen e thellë do të vazhdojnë të na ndjekin nëse japim garanci që betejën do ta vazhdojmë për ta” tha lideri aktual i PD.
“Kush mendon se beteja mbaroi me 25 prill e ka gabim , kush mendon se do të na ulë në gjunjë e ka dy herë gabim. Pse? Sepse kemi dalë gjithmonë të bashkuar në betejë, të bashkuar ishim në betejën e 25 prillit dhe kërkesa ime e parë është që të bashkuar të dalim edhe nga kjo garë e brendshme e cila është një oportunitet shumë më i  madh se fushata normale që s’na jep kohë të flasim me njëri-tjetrin se po ju flasim qytetarëve që  të flasim me njëri-tjetrin drejtpërdrejt” u tha zoti Basha përkrahësve të tij në Berat dhe Dimal.