Basha thirrje BE: Serbia dhe 5 vendet anëtare të njohin Kosovën

Kreu i PD, Lulzim Basha, i kërkoi Bashkimit Evropian që të përqëndrojë energjitë e saj në drejtim të arritjes së një marrëveshje përfundimtare me njohje reciproke mes Kosovës dhe Serbisë. Deklarata u bë nga samiti i Partive Popullore Europiane me partitë e djathta të Ballkanit Perëndimor.

“Vetëm në këtë mënyrë do të hyjmë në një epokë të re të bashkëpunimit dhe zhvillimit Ngjarjet e fundit në kufirin Kosovë-Serbi dhe në Malin e Zi, tregojnë se sa e brishtë mbetet paqja dhe stabiliteti në këtë rajon. Remineshencat e një të kaluare jo shumë të largët, të përziera me interesa gjeo-strategjike të fuqive jo-perëndimore, janë një fitil që mund të ndizet nga momenti në moment”, tha Basha në fjalën e mbajtur në këtë samit.

Sipas kreut të PD, problemet e pazgjidhura shumë lehtë mund të kthehen në kriza.

“Kjo është arsyeja pse është jetike për BE-në që të përqëndrojë energjinë e saj drejt marrëveshjes përfundimtare të njohjes reciproke midis Kosovës dhe Serbisë dhe për ta arritur këtë, njohja e Kosovës nga 5 Shtetet Anëtare të mbetura duhet së pari të përfundojë. Asnjë paralelizëm nuk mund të bëhet, asnjë argument nuk mund të justifikojë mosnjohjen e pavarësisë së Kosovës, përderisa Gjykata Ndërkombëtare e Drejtësisë e ka certifikuar atë”, u shpreh ai.

Sipas Bashës, kjo është e vetmja mënyrë që Ballkani Perëndimor do të hyjë në një epokë të re të bashkëpunimit dhe zhvillimit, e cila me siguri do të jetë një vlerë e shtuar për BE-në.