Berisha: Raporti i KE-së tregon rritjen ekonomike
Shqipëria renditet në vendin me të ardhura të mëdha mbi mesataren në rajon. Kështu është shprehur kryeministri Berisha në mbledhjen e sotme të qeverisë duke iu referuar një raporti të Komisionit Europian për ekonominë e rajonit.
Sipas tij ky vlerësim mjaft i rëndësishëm përbën një arritje të madhe për vendin që nisi lirinë e tregut si vendi i 3 ose 4 më i varfër në rajon.
“Në raportin e KE-së thuhet se rritja e ekonomisë shqiptare ka kapur shifrën prej 4.9 përqind ndërsa vlerësohet se Shqipëria është vendi që ndjeu më pak krizën” theksoi Berisha.
Kreu i qeverisë gjithashtu theksoi se Shqipëria në raportin e KE-së në vitin 2009, renditet e 25-ta, nga 80-ta që renditej në vitin 2006.
“Një turravrap i shkëlqyer. Shqipëria lë mbrapa 116 vende në raport me treguesin e performacës së investimeve të huaja. Po në rast se ju referohemi shifrave, në qoftë se në vitin 2006, investimet e huaja ishin 258 milion euro, në vitin 2009 këto investime arritën në mbi 700 milion euro. Në shkallën e pjesëmarrjes së ndërmarrjeve të huaja në ekonominë shqiptare, Shqipëria renditet lart, dëshmi kjo e një ekonomie tërësisht të hapur”, ka theksuar kryeministri Berisha.