Berisha: Shqipëria, superfuqi e vogël në rajon

Kryeministri i Republikës së Shqipërisë, Sali Berisha ka deklaruar se Shqipëria do të bëhet një superfuqi e vogël e energjisë së rinovuar në rajon.

Ai ka theksuar se Shqipëria mund të ecë i sigurt si një “Green Albania”, pasi ka burime natyrore të panumërta dhe ka ftuar bankat e mëdha që të financojnë në këtë sektor.

“Shqipëria është një vend me burime të mëdha të energjisë së rinovueshme. Ky vend derdh në det 6 herë më shumë ujëra se sa ka në sipërfaqen e tij. Është vendi më malor në rajon, por i bekuar se malet e tij janë të pasura me ujë. Shqipëria mund të ecë e sigurt si një “Green Albania”, burimet e saj janë të panumërta”, tha Berisha.

“Qeveria është e gatshme të vendosë kuadrin ligjor më stimulues për ndërtimin e tyre, por ftoj edhe bankat e mëdha që të konsiderojnë financimin e këtyre projekteve në sektorin privat, por dhe të potencialeve eksportues të Shqipërisë. Shqipëria do të bëhet një superfuqi e vogël në rajon. Potenciali i Shqipërisë është shumë i madh në fushën e erës. Shqipëria është një nga vendet më me diell në rajon dhe Evropë dhe ka një potencial të madh të energjisë diellore”, theksoi Berisha.