Berisha shpëton të birin për Gërdecin, drejtësia gjunjëzohet para tijNga TemaSërish këtë vit çështja e Gërdecit ishte në qendër të vëmendjes së opinionit publik. Por, ashtu siç ishte paralajmëruar nga mediet, Fatmir Mediu, i akuzuari kryesor për këtë

Nëse dëshironi të lexoni edicionin online të gazetës në PDF klikoni këtu.

Berisha shpëton të birin për Gërdecin, drejtësia gjunjëzohet para tijNga TemaSërish këtë vit çështja e Gërdecit ishte në qendër të vëmendjes së opinionit publik. Por, ashtu siç ishte paralajmëruar nga mediet, Fatmir Mediu, i akuzuari kryesor për këtë dosje, arriti që të shpëtojë pa u gjykuar, falë imunitetit të deputetit. Më pas ai u katapultua në kabinetin qeveritar, pavarësisht deklarimeve të kryeministrit për “duar të pastra” dhe qeverisje pa mburojën e imunitetit. Hipokrizia arriti kulmin, por kryeministrit pak i interesonte kjo gjë. Ai po nxirrte të paprekur të birin nga kjo aferë. Gazeta “TemA” solli një seri dokumentesh që faktonin se njeriu që qëndronte pas këtij pazari dhe që përdorte pushtetin e të atit, ishte Shkëlzen Berisha. Më poshtë po sjellim disa nga shkrimet që plotësuan panoramën e kësaj afere. Në fund të këtij viti, ajo që mund të thuhet me plot bindje është se drejtësia nuk arriti që të zbardhë këtë aferë, duke gjykuar thjesht disa nëpunës të rëndomtë që hidhnin firma mbi materialet që u çoheshin në tryezë.

Sekretarja e Bumçit: I nisa Shkëlzenit faksin që më dha ministri
11.06.2009

Shkëlzen Berisha, djali i kryeministrit shqiptar, Sali Berisha, është lobuesi kryesor për kontratën e Gërdecit.
Këtë fakt e përforcon dëshmia e sekretares së ish-ministrit të Drejtësisë, Aldo Bumçi, dhënë organeve hetimore. Ajo ka konfirmuar se i ka nisur vetë birit të kryeministrit Berisha faksin që i ka dhënë ministri Aldo Bumçi, ku kërkohej mendim për projektvendimin që do i hapte rrugë ndërtimit të Gërdecit. Para disa kohësh gazeta “TemA” botoi faksin që nisej zyrtarisht nga Ministria e Drejtësisë dhe mbërrinte e protokollohej në Ministrinë e Mbrojtjes me shënimin “Për Shkëlzen Berishën”.
Dëshmia e ish-sekretares së Bumçit, Anjola Agolli, hedh dritë për këtë pjesë të trishtë të kapjes së shtetit nga biri i kryeministrit.
Ajo e nis rrëfimin duke treguar se edhe pse posti i saj është politik, dhe mund të ishte larguar pas ardhjes në pushtet të qeverisë së djathtë, Aldo Bumçi e mbajti atë sërish në punë. Agolli tregon se mban mend shumë mirë se shkresën me shënimin ia ka dhënë ministri vetë dhe nuk ka ardhur nga ndonjë drejtori tjetër, ndërsa shton se shkrimi me dorë është i vetë Bumçit.
Një gjë të tillë ajo e mban mend shumë mirë, për shkak se në atë periudhë ishte e vetme në punë, sepse sekretarja tjetër kishte marrë lejen e lindjes. Ajo nuk shpjegon se pse ishte nisur me faks kjo shkresë dhe pse një tjetër ishte nisur me postë, por është fakt se duke parë datat është e qartë se nxitimi bëhej për shkak se vendimi do kalonte së shpejti në qeveri.
Agolli thotë se mban mend që të paktën dhe dy herë të tjera Shkëlzen Berisha ka qenë në zyrën e ministrit të Drejtësisë, Aldo Bumçi.
Sipas saj, në Ministrinë e Mbrojtjes i janë përgjigjur në momentin e nisjes së faksit, se nuk njohin asnjë Shkëlzen Berisha që punonte në atë institucion, por ajo u ka thënë që ka marrë urdhër që të nisë këtë faks për atë person dhe kështu ka vepruar.

Kunati i Selmanllarit drejtonte grupin ‘hije’ të trafikut në Gërdec
14.06.2009

Rrahman Selmanllari, miku i ngushtë i djalit të kryeministrit, Shkëlzen Berisha, është një nga pronarët e Fabrikës së Vdekjes në Gërdec.
Dëshmia e tij në prokurori rrëzohet nga provat e sekuestruara nga organi i akuzës, që faktojnë se pas firmës amerikane, “Southern Ammunition”, qëndronte vetë Rrahman Selmanllari.
“Nuk jam angazhuar në ndërtimin e fabrikës së demontimit në Gërdec”, - deklaron në dëshminë e tij Selmanllari. Por një autorizim i datës 30 prill 2007, rrëzon të gjithë dëshminë e Selmanllarit që duhet thënë se është e mbushur me gënjeshtra. E vetmja e vërtetë është që ai është mik i ngushtë me djalin e kryeministrit Berisha.
“Unë e njoh shtetasin Shkëlzen Berisha. Kemi lidhje shoqërore për më tepër se dhjetë vjet. Kur është në Shqipëri, takohemi shpesh me njëri-tjetrin”, - deklaron Selmanllari.
Në autorizimin e SAC thuhet se do jetë Selmanllari që në emër të kompanisë amerikane do nënshkruajë marrëveshjet me Ministrinë e Mbrojtjes për ndërtimin e fabrikës së demontimit në Gërdec, Vorë.
Por dëshmia e tij bëhet akoma më e rëndë, kur asaj i shtohet dëshmia e një grupi punonjësish, të njohur si grupi “hije”, që vepronte në turnin e tretë në Gërdec, dhe që merrej me organizimin e municioneve.
Njerëz të afërm të Selmanllarit ishin pjesë e këtij grupi dhe dëshmitë e tyre janë të mbushura me kundërshti dhe gënjeshtra. Por prokuroria nuk ka hetuar më tej për këtë grup, që në fakt përfaqëson krahun e Selmanllarit në pronën e tij.
Bëhet fjalë për shtetasit Seran Maçi, Nazmi Isufaj, Haxhi Mara, Kledian Qefaliaj, Benard Kaçaça, Shpëtim Kaçaça dhe baxhanaku i kryeministrit, Muhamet Hoxha. Të gjithë të afërm, kunetër, krushq e miq të Selmanllarit punonin turni i tretë, nuk përziheshin me punonjësit e “AlbaDemil”, nuk merrnin paga përmes borderove, por bënin pjesën e punës për pasurimin me anë të trafikut në këtë punishte.

Mediu “tradhton” Berishën: Në zyrë u premton, këtu hesht...
15.06.2009

Kryeministri, Sali Berisha, i ka premtuar kompanisë “Southern Ammunition Company” se do i ndihmojë për të marrë kontratën për demontimin e municioneve.
Ky fakt është tepër i rëndë, për shkak se në dokumentet që gazeta Tema ka botuar, rezulton se përfaqësuesi i SAC është Rrahman Selmanllari, miku i ngushtë i djalit të kryeministrit Berisha.
Lobimin e kryeministrit për këtë kontratë e zbulon vetë ministri i Mbrojtjes, Fatmir Mediu, gjatë të famshmes mbledhje qeverie, ku do kalohej kontrata për SAC.
Gazeta “TemA” zbardh procesverbalin e mbledhjes së qeverisë, më datë 17 shkurt. Kjo mbledhje është përfolur shumë për debatet mes ministrit të Financave, Ridvan Bode dhe ish-ministrit të Mbrojtjes, Fatmir Mediu.
Dhe në fakt ashtu është. Mediu ka synuar që të kalojë përmes qeverisë dhënien e kontratës me prokurim të drejtpërdrejtë për kompaninë SAC, por është kundërshtuar ashpër nga ministri i Financave, Ridvan Bode, që kërkon që një gjë e tillë të bëhet me ankand.
“Për mendimin tim ky problem ka këto elementë: Këtu kemi të bëjmë me një shërbim publik, n’daç shitje, n’daç shërbim, n’daç çfarëdo që të jetë, minimumi bëhet me tender. Këtu vihet me prokurim të drejtpërdrejtë”, - thotë Bode, duke kundërshtuar Mediun që insiston se nuk ka mundësi që kjo të bëhet me ankand, për shkak se nuk ofrohet asnjë kompani tjetër. Por Bode pretendon të kundërtën.
Debati zgjerohet, ndërsa kryeministri e kupton që kundërshtimi i Bodes nuk ka të ndaluar. Duhet theksuar se gjatë gjithë debatit, Berisha shfaqet mjaft i urtë dhe i bindur përkundrejt Fatmir Mediut, çka të lë të kuptosh se ishte i interesuar për kalimin e projektit. Por ministri i Financave kërkon që, në rast se kjo kontratë do jepet me prokurim të drejtpërdrejtë, këtë veprim ta bëjë Ministria e Mbrojtjes, për shkak se Këshillit të Ministrave nuk i lejohet një gjë e tillë me ligj. Këtë fakt e pranon dhe kryeministri, Sali Berisha, sipas të cilit nuk mund të vendosë Këshilli i Ministrave për një kontratë me një emër të specifikuar firme. Berisha dhe Bode thonë se Këshilli i Ministrave mund të vendosë vetëm për procedurat, duke i lënë kështu përgjegjësinë Ministrisë së Mbrojtjes për veprimet.
Këtu Mediu ndjehet pak i tradhtuar dhe deklaron se Berisha po lobon për këto kompani të huaja që vijnë në Shqipëri.
“Dhe unë po e ngre zoti kryeministër, këtu të gjitha kompanive të huaja që vijnë, iu thuhet “Po” nga ana juaj, iu thuhet “Po” me vullnet politik. Nuk ka asnjë implementim për të ecur më tej. Të gjithë janë te dera, vetëm presin dhe ikin”, - deklaron Mediu.
Berisha e mbyll mbledhjen duke thënë se do jetë një grup pune që do shqyrtojë këtë situatë dhe do ri-hartohet projekti. Mediu deklaron se shpreson që edhe kjo firmë të mos ikë si shumë të tjera.

Liri Berisha dhe e motra, deklarata të ndryshme për baxhanakun e Berishës
14.03.2009

Gruaja e kryeministrit të Shqipërisë, Sali Berisha, ka dhënë dëshmi të rreme publike për rrethanat në të cilat është punësuar baxhanaku i kryeministrit, Sali Berisha, në Gërdec dhe për punën që ai bënte aty. Në një intervistë dhënë gazetës “Panorama”, në datën 15.04.2008, zonja Berisha thotë se ajo dhe i biri i saj nuk ia kishin treguar Sali Berishës faktin që ai kishte një baxhanak, që punonte në Gërdec dhe që ishte nga të vrarët mes viktimave.
Ja si e përshkruan ajo momentin kur është ndjerë keq që Berisha nuk dinte gjë për baxhanakun. “Problemi ishte se ai nuk pati rast ta takonte asnjëherë. Ata (motra me të shoqin), kishin vetëm tre muaj që kishin ardhur. Saliu lexonte emrin aty dhe unë thosha: “E zeza, si nuk ia kemi thënë!” Ato kohë kishim trevjetorin e vdekjes së mamasë dhe kishim menduar që ta linim për më vonë prezantimin familjar me njerëzit e familjes. Isha unë ajo që ia caktova si detyrë tim biri t’ia shpjegonte situatën” (“Panorama”, 15 prill 2008).
Shpjegimi i zonjës Berisha ka disa mangësi thelbësore. Mangësia e parë ka të bëjë me vetë imazhin e familjes Berisha dhe marrëdhëniet perfekte që ata kanë si çift. Çifti Berisha shquhet për raporte shumë të sinqerta me njëri-tjetrin dhe marrëdhënie shumë të mira. Në një raport të tillë familjar, që kurrsesi s’mund të besojmë se është hipokrit, nuk mund të ndodhë që zonja Berisha të mos i ketë folur asnjëherë burrit të saj për baxhanakun, i cili po punonte në një punë që e kishte rekomanduar djali i tyre. Por hijet e dyshimit rriten më poshtë, kur zonja Liri Berisha tregon se si ka mësuar që kunati i saj po punonte në Gërdec. “Kur një ditë shkojmë në varreza te prindërit, e pyes motrën, nëse i shoqi kishte filluar punë dhe ajo më tregoi se po punonte diku afër Marikajt. Kur e pyes se çfarë bën, ajo m’u përgjigj: “Mban ca arka municionesh”. Është i kënaqur me punën? - e pyeta. “Jo dhe aq, mban ca arka, por do të rrijë veç pak, sa të gjejë një punë tjetër më të mirë”. Në kohën që vdiq, kishte marrë vetëm dy rroga.” (“Panorama”, 15 prill 2008).
Kjo deklaratë e zonjës Liri Berisha bie ndesh me deklaratat e motrës së saj, Vjollca Hoxha. Zonja Hoxha, e cila duket se ka qenë në periferi të përfitimeve nga pushteti i kunatit të saj, e tregon ndryshe historinë. Në një intervistë në “Gazeta Shqiptare” më 15 qershor 2008 ajo thotë se burri i saj ishte kthyer në Shqipëri që në muajin nëntor, kurse ajo vetë që në fillim të vitit 2007, dhe jo siç thotë Liri Berisha, “ata (motra me të shoqin) kishin vetëm tre muaj që kishin ardhur”.
Vjollca Hoxha, motra e Liri Berishës, në një intervistë ekskluzive për “Gazeta Shqiptare”, rrëfen se ishte kthyer në Shqipëri në qershor të 2007 për të vizituar familjarët, dhe se në Shqipëri e mbante një operacion që duhej të kryente, pasi kishte këputur mineskun. Më pas kishte ftuar dhe Muhametin të kthehej në Shqipëri, derisa të përfundonte operacioni. (“Gazeta Shqiptare”, 15 qershor 2008).
Nga ana tjetër, të dy motrat nuk bien dakord për faktin se a kishin dijeni ato për punën që bënte i ndjeri Muhamet Hoxha. Vjollca tregon se nuk e dinte që bashkëshorti i saj punonte në një fabrikë demontimi të armëve: “Po si mendoni ju, që po ta kisha ditur, do lejoja që im shoq të punonte aty? Unë me të vërtetë s’jam e pasur, kam punuar si gjithë shqiptarët e tjerë nëpër Evropë, tri punë në ditë, nga kuzhiniere te pastruese, por nuk isha duke vdekur nga uria që të lejoja që im shoq të punonte aty, në mes të rrezikut”, - thotë gjatë intervistës së saj Vjollca Rama. (“Gazeta Shqiptare”, 15 qershor 2008).
Ndryshe nga kjo, zonja Liri Berisha në intervistën e saj thotë: “Kur e pyes (motrën) se çfarë bën (burri), ajo m’u përgjigj: “Mban ca arka municionesh”. (Gazeta “Panorama”, 15 prill 208).
Këto lajthitje të zonjës Berisha në intervistën e saj publike për Gërdecin dëshmojnë se ajo, ose nuk është e sinqertë me opinionin publik, ose nuk ka qenë e sinqertë me motrën e saj dhe bashkëshortin e saj, Sali Berisha. Motra e saj provon se ka qenë me burrin në Shqipëri prej vitit 2007 dhe se nuk e ka ditur se burri i saj punonte mbajtës arkash municionesh. Zonja Berisha thotë që ata kishin tre muaj që kishin ardhur dhe motra i kishte thënë se burri mbante arka me municione.
Nga ana tjetër, në këtë mes zonja Berisha përpiqet të zhdukë rolin e djalit të saj dhe e shfaq atë vetëm në rolin e lajmëtarit të babait, pasi i ndjeri Hoxha ishte varrosur. Kjo është një skenë shumë e pabesueshme. Kushdo që e njeh familjen Berisha dhe marrëdhëniet perfekte mes tyre, e ka të pabesueshme të konceptojë që Berisha të mos vihej në dijeni, së paku në kohë reale për vdekjen e baxhanakut të tij. Ai është një person shumë i lidhur me traditën dhe shkon për ngushëllime në rast vdekjesh dhe te baxhanakët e militantëve të PD, jo më tek i veti. Po ashtu, një detaj i fortë psikologjik është fakti që ai ngatërroi emrin e baxhanakut të tij, duke e lexuar në Kuvend, çka të bën të mendosh se ndërkohë ishte njoftuar për humbjen e tij dhe u përpoq ta nxirrte atë nga vëmendja e opinionit publik.
Deklaratat kontradiktore të zonjës Berisha mbi raportet me kunatin e saj dhe përpjekja për ta fshehur faktin që i biri i saj ishte njeriu që e punësoi atë në Gërdec, bën që ajo të ngatërrohet në deklarata me vetë motrën e saj, e cila po ndjen, jo vetëm peshën e humbjes së njeriut të saj të dashur, por dhe përgojimin e tij publik për shkak të punëdhënësit të tij.
Ndërkohë, i ndjeri Hoxha është varrosur një ditë pas vdekjes, dhe pjesëtarë të familjes Berisha kanë marrë pjesë në ngushëllim. Vajza dhe djali i Sali Berishës kanë marrë pjesë dhe në ceremoninë e varrimit.

Zamira Durda: “Vota ime për Ilir Metën shkoi për vrasësit e tim biri”

Që prej vdekjes së të birit, më 15 mars, në mendjen e Zamira Durdës ekziston vetëm një mendim, të cilin do që ta kthejë patjetër në veprim. Të bëjë të mundur që përgjegjësit e vdekjes së Edisonit, të ndëshkohen. “Unë tashmë jetoj vetëm për t’u çjerrë maskën autorëve dhe përgjegjësve të shpërthimit të Gërdecit. Jam betuar para varrit të tim biri se do t’i shkoj deri në fund kësaj çështjeje dhe do të bëj çmos që përgjegjësit e vdekjes së tij të dalin përpara drejtësisë dhe të ndëshkohen”, - thotë Zamira.

Mediu përgjegjës, të gjykohet me çdo kusht

Vetëm dy ditë më parë, në emër të familjarëve të viktimave të Gërdecit, Zamira Durda dorëzoi në prokurori kallëzimin penal ndaj ministrit të Mjedisit, Fatmir Mediu. Sipas saj, Mediu është përgjegjës për shpërthimin më 15 mars dhe për këtë arsye duhet të përballet me akuzat në gjykatë. “Kërkoj me çdo kusht gjykimin e Fatmir Mediut, pasi mendoj se ai është përgjegjësi kryesor për tragjedinë e 15 marsit. Ne kërkojmë që ai të dalë para gjykatës dhe të gjykohet për akuzat. Duhet që të përballet me gjykatën dhe kjo e fundit të vendosë, nëse është fajtor apo jo”, - thotë e ëma e Edisonit, i cili humbi jetën vetëm në moshën 6-vjeçare.
Zamira Durda thotë se prokuroria nuk ka hetuar siç duhet për këtë çështje, madje, sipas saj, organi i akuzës duhet që ta kishte akuzuar Mediun edhe për vrasje dhe jo vetëm për shpërdorim detyre. “Mendoj që çështja nuk është hetuar si duhet nga ana e prokurorisë dhe akuzat e ngritura në rastin e Mediut janë të padrejta. Përveç akuzës së shpërdorimit të detyrës, ai duhej që të akuzohej edhe për vrasje, ashtu si dhe Delijorgji dhe Pinari. Është e patolerueshme ajo që ka ndodhur, dhe ai si ministër i Mbrojtjes ka përgjegjësinë kryesore për tragjedinë, pasi lejoi që të demontoheshin municione dhe predha në një zonë të banuar, dhe për më tepër nuk urdhëroi kontrollet për masat e sigurisë, kur dihet që ato nuk ekzistonin, ndërsa në fabrikë punonin edhe fëmijë”, - pohon Zamira.

Mediu ministër, turp i madh!

Emërimi sërish ministër i Fatmir Mediut është fakti më irritues për Zamira Durdën. Sipas saj, ky është një turp dhe fyerje e madhe, jo vetëm ndaj viktimave dhe familjarëve të shpërthimit të 15 marsit, por gjithë shqiptarëve. Madje, Zamira thotë se emërimi i Mediut ministër tregon qartë se, jo vetëm qeveria, por edhe Presidenti i Republikës, që emëroi dekretimin e tij, janë të korruptuar.
“Emërimi i Fatmir Mediut si ministër i Mbrojtjes është një turp i vërtetë dhe një fyerje, jo vetëm për ne që humbëm të afërmit tanë, por për gjithë shqiptarët, që duhet të kenë për ministër një të akuzuar për vrasje, i cili nuk përballet me drejtësinë. Emërimi i tij si ministër tregon qartë që gjithë qeveria është e korruptuar, madje edhe presidenti, i cili përgjegjësinë e emërimit të Mediut ia la Berishës. Ai nuk duhej të kishte dekretuar Mediun si ministër”, - shprehet Durda.
Ajo thotë se tashmë e ka humbur besimin te politika, e cila jo vetëm që nuk i ka ndihmuar për zbardhjen e çështjes dhe ndëshkimin e autorëve të tragjedisë, por iu është kundërvënë. Sipas saj, politikanët e të dyja krahëve janë të zhytur në korrupsion. “Te politika e kam humbur besimin se mund të na ndihmojë për të ndëshkuar përgjegjësit e shpërthimit. Të gjithë politikanët, si të djathtët, ashtu dhe të majtët, janë të përlyer dhe të zhytur në korrupsion”, - thotë ajo.
Zamira shpreh zhgënjimin e vet edhe ndaj opozitës, e cila, sipas saj, nuk i ka mbështetur dhe nuk i ka ndihmuar dhe për më tepër i ka përdorur politikisht ata. “Opozita nuk ka na përkrahur dhe nuk na ka mbështetur si duhet. Madje, ata na kanë përdorur vetëm për interesat e veta. Që kur ndodhi tragjedia, ajo duhet që të kishte reaguar dhe të kërkonte rrëzimin e qeverisë dhe jo ta mbështeste atë. Opozita duhet të kërkojë me patjetër heqjen e imunitetit të Mediut dhe duhet të ndikojë për miratimin e një ligji të posaçëm që familjarët e viktimave të marrin pension”.

Gjykata e Lartë dhe drejtësia e munguar

Pushimi i dosjes penale ndaj Fatmir Mediut nga ana e Gjykatës së Lartë, sipas Zamirës, ka qenë një fyerje e rëndë për familjarët e viktimave dhe një vrasje e dytë ndaj këtyre të fundit. Sipas saj, kur nuk jep drejtësi institucioni më i lartë i drejtësisë sonë, atëherë nuk mund të presim drejtësi nga institucionet e tjera. “Gjykata e Lartë është treguar e njëanshme, si në rastin e ndarjes dhe veçimit të dosjes së Mediut, ashtu dhe në pushimin e akuzës ndaj tij. Për më tepër, ajo nuk pranoi që ne të ishim palë në këtë proces, edhe pse jemi prekur drejtpërdrejt nga ngjarja dhe kemi humbur të afërmit tanë. Mund të them që Gjykata e Lartë, me atë që ka bërë, ka treguar veten, ndërsa ne na ka fyer rëndë dhe na ka vrarë për herë të dytë. Kur nuk vendos kjo gjykatë drejtësi, që është dhe institucioni më i lartë i drejtësisë, atëherë nga kush do vendoset drejtësia në vendin tonë?! Dua të them se edhe Gjykata e Shkallës së Parë nuk ka vepruar si duhet, duke na mohuar të drejtën të jemi palë në procesin ndaj të pandehurve”, - shprehet Zamira.
Kjo e fundit pohon se, pavarësisht një sërë veprimesh, si ndarja e dosjes, pushimi i dosjes penale ndaj Mediut, mospërfshirja e tyre si palë në proces etj., ajo vazhdon që të shpresojë. Por, shpresa, sipas Durdës, ka një kufi. Dhe nëse nuk vendoset dhe veprohet sa më parë, ajo thotë se do të veprojë njësoj si ata që i vranë djalin e vogël. “Pavarësisht hetimeve të mangëta, pavarësisht ndarjes së dosjes, pavarësisht se nuk kanë pranuar si palë, pavarësisht pushimit të dosjes penale të Fatmir Mediut, ne do të vazhdojmë që të kemi besim dhe shpresë te drejtësia. Por ky besim dhe kjo shpresë nuk mund të zgjasin përjetë. Nëse drejtësia nuk vepron sa më parë, unë jam gati që të bëhem kamikaze dhe të vras ata që më morën jetën e djalit. Tashmë mua nuk më bën përshtypje asgjë. Për të vendosur drejtësinë ndaj atyre që më vranë djalin, jam e gatshme që të veproj njëlloj si ata. Si të mos veproj në këtë mënyrë, kur unë ende nuk kam as trupin e tim ati për ta qarë, që gjithashtu humbi jetën në shpërthimin e 15 marsit?”- pohon Durda.

“Meta më kërkoi votën në shtëpi për të ndëshkuar qeverinë e Gërdecit”

Edhe pse është përpjekur që t’i shmanget politizimit të dhimbjes dhe fatkeqësisë së saj, Zamira Durda nuk mund ta pranojë faktin që vota e saj në zgjedhjet e 28 qershorit shkoi për ata që ajo i cilëson si vrasësit e të birit. Zamira tregon se është e zhgënjyer nga Ilir Meta, të cilin e ka pasur mik shtëpie dhe i dha votën. E irrituar ajo thotë se kreu i LSI e kishte vizituar në shtëpi dhe i kishte premtuar që pas 28 qershorit “qeveria e Gërdecit”, siç e quante ai, nuk do të ishte më në pushtet. Ndërsa pas zgjedhjeve ndodhi krejt e kundërta, pasi Meta, jo vetëm që nuk e mbajti premtimin e dhënë ndaj Zamirës, por u bashkua me ata, të cilët i akuzonte si vrasës. “Jam e zhgënjyer nga Ilir Meta, i cili para zgjedhjeve të 28 qershorit më erdhi në shtëpi dhe më tha se do të ndikonte për dënimin e shkaktarëve të tragjedisë që më mori djalin. Unë i dhashë votën atij që të rrëzonte “qeverinë e Gërdecit”, siç e cilësonte Meta dhe jo të bashkohej me të. Ndihem e zhgënjyer që vota ime ka shkuar dhe ka ndihmuar pikërisht vrasësit e tim biri. Nuk mund ta mendoja kurrë këtë gjë. Si mos të irritohem nga ky fakt, kur vota ime shkon pikërisht te vrasësit e djalit tim? Si mos të bëhem kamikaze, kur shoh këtë padrejtësi dhe këtë fyerje të rëndë që më është bërë?” - shprehet e irrituar ajo.
Zamira thotë se nuk do t’ia kishte dhënë kurrë votën Metës, nëse do ta dinte se ky i fundit do të bashkohej në të njëjtën qeveri, të cilën ajo e akuzon si përgjegjëse për vdekjen e të birit.

“Berisha hipokrit. Na nxori forcat e Sigurimit, kur shkuam ta takojmë”

Zamira Durda thotë se në gjithë historinë e Gërdecit, kryeministri Berisha ka qenë më hipokriti. Sipas saj, ai u ka premtuar atyre se do t’i ndihmonte dhe do të bënte të mundur ndëshkimin e përgjegjësve, që në fakt nuk ka ndodhur. Madje Zamira thotë se ka tentuar disa herë që ta takojë personalisht atë, por i kanë nxjerrë përpara forcat e Sigurimit. Ajo thotë se qeveria e Berishës është tallur keq me fatkeqësinë e tyre dhe në vend që t’u lidhte një pension të veçantë, u thoshte se viktimat nuk kanë paguar siguracionet. Aq hipokrit është treguar Berisha, sipas Durdës, sa njerëzit e vet i kanë telefonuar familjarëve të saj për t’u shkuar vizitë në banesë gjatë fushatës zgjedhore, gjë që ata e kanë kundërshtuar me përbuzjes. Berisha, sipas Zamirës, është nga ata tipa që të vret ditën dhe të qan natën. “Kryeministri Berisha ka qenë më hipokriti në këtë histori. Ai na premtoi se do të na jepte pension dhe kjo gjë nuk ka ndodhur. Unë personalisht nuk kam marrë gjë, ndërsa gratë e burrave që gjetën vdekjen në Gërdec marrin vetëm një pension qesharak për 50-60 mijë lekë. Dhe këto i marrin, sepse u takon me ligj, jo sepse ua dha posaçërisht qeveria. Kur shkuam te kryeministri për të kërkuar që të na lidhte pension, drejtori i Marrëdhënieve me Publikun, Elham Sharra, na tha që nuk u takon pension, pasi të afërmit tanë që humbën jetën nuk kishin paguar siguracionin. A ka tallje më të madhe se kjo?! Madje, disa herë, kur kemi shkuar për të takuar kryeministrin, na kanë sjellë edhe forcat speciale, të cilat na kanë kërcënuar. Kryeministri Berisha është treguar hipokrit që në fillim, kur tha se nuk e dinte se ku binte dhe çfarë bëhej në Gërdec, madje nuk e dinte që në fabrikën e demontimit të municioneve punonte baxhanaku i tij.
Berisha madje mashtroi dhe u tall me Mimoza Krujën, e cila u detyrua që ta priste atë në shtëpi. Ai i premtoi asaj se do ta ndihmonte të merrte pension tri ditë më pas, ndërsa një gjë e tillë nuk ka ndodhur deri më sot dhe ajo duhet që të mbajë tri vajzat e veta me rrogën prej 15 mijë lekësh që merr si pastruese në Bashkinë e Vorës. Berisha është aq hipokrit, sa njerëzit e tij gjatë fushatës zgjedhore morën në telefon shtëpinë e tim ati, i cili gjeti vdekjen më 15 shtator, për të bërë vizitë te mamaja dhe vëllezërit e mi. Ne e përbuzëm dhe nuk e pranuam kërkesën e tij, pasi Berisha është nga ata njerëz që të vret ditën dhe të qan natën”, - pohon gjatë fjalës së saj Zamira Durda.

“Gërdeci, njolla e turpit për PD, dhe jo e krenarisë”

Irritimin më të madh Zamira Durda thotë se e ka ndjerë pas zgjedhjeve të 28 qershorit, kur zëdhënësja e PD, Majlinda Bregu, dilte dhe tregonte me arrogancë se Partia Demokratike kishte fituar në Gërdec. Sipas saj, Gërdeci nuk duhet të jetë krenaria e PD, por turpi i saj, pasi është shenja e qartë e korruptimit të kësaj të fundit.
“Na kanë fyer rëndë dhe me hipokrizinë më të madhe. Nuk dija ku të futesha nga irritimi, kur pas zgjedhjeve të 28 qershorit, Majlinda Bregu dilte në televizor dhe thoshte me krenari dhe arrogancë se PD kishte fituar në Gërdec. Si nuk i erdhi turp asaj femre? A ka fëmijë vetë ajo? A kanë zemër këta politikanë, që na fyejnë dhe luajnë përditë me dhimbjen tonë? Si mund të krenohet PD se fitoi zgjedhjet në Gërdec, kur ajo na vrau të afërmit tanë? Ajo na mori jetën. ǒkuptim ka tashmë fitorja në Gërdec, kur në fakt është njolla e zezë e kësaj qeverie dhe shenja më e qartë e korrupsionit dhe kapjes së shtetit?” - shprehet Zamira.
Kjo e fundit pohon se ka shkuar edhe në zyrën e kryeparlamentares, Jozefina Topalli, e cila i ka premtuar se do ta ndihmonte që të zgjidhte çështjen e pensionit për familjarët e viktimave të Gërdecit. Por, që prej asaj kohe, ajo thotë se Topalli nuk ia ka ngritur më telefonin, edhe pse ka tentuar që ta marrë me qindra herë në telefon. “Kryeparlamentarja Jozefina Topalli më priti në zyrën e vet dhe më premtoi se do të na ndihmonte për zgjidhjen e problemeve tona. Ajo më dha numrin e telefonit dhe më kërkoi që ta merrja për çdo shqetësim. Por, premtimi i saj mbeti vetëm formal. Kam tentuar me qindra herë që ta marr në telefon, por tashmë nuk ma hap më”, - thotë Zamira.