Bie çmimi i naftës, që dje, 5 lekë më pak

Në tregun ndërkombëtar nafta ka rënë me 20%, ndërsa në Shqipëri ulja është vetëm 2.5%

Çmimet e karburanteve në tregun shqiptar u ulën me gati 5 lekë për litër, por krahasuar me çmimet e tregut ndërkombëtar, vërehet se janë ende shumë të larta. Gjatë ditëve të fundit, të gjitha pikat e karburantit në vend ulën çmimet e eurodizelit, naftës D2 dhe benzinës, kryesisht për shkak të ftohjes së çmimeve të naftës në tregun ndërkombëtar. Më herët gjatë korrikut, çmimi i eurodiezelit arriti në Shqipëri në 172 lekë, çmimi më i lartë i regjistruar ndonjëherë. Gjatë ditëve të fundit, eurodiezeli u shit për 166 lekë për litër në Tiranë, ndërsa në pjesën tjetër të vendit ra deri në 163 lekë për litër. Dy ditë më parë, Instituti i Statistikave njoftoi se rritja e çmimeve të naftës në korrik qe 2.3%, ndërsa benzina u rrit me 1.6%. Gjatë muajit qershor, çmimi i karburanteve qe rritur me 6.1%.

Sa një e dhjeta e tregut ndërkombëtar

Çmimet e produkteve të gatshme të hidrokarbureve në tregun ndërkombëtar u ulën me rreth 20% që kur arritën kulmin në javën e dytë të korrikut. Por ulja e çmimeve në tregun shqiptar gjatë ditëve të fundit qe vetëm 2.5%. Tregtarët thonë se do të duhet të kalojë edhe disa javë para se rënia e çmimeve në bursë të pasqyrohet në tregun e brendshëm. Të dhënat e Financial Times tregojnë se çmimi i diezelit të standardit gjerman ra në 1023 dollarë për ton gjatë ditëve të fundit. Në korrik nafta arriti kulmin në 1322 dollarë për ton. Çmimi i benzinës ra me 17% në tregun ndërkombëtar gjatë ditëve të fundit, duke zbritur në kuotën e 977 dollarëve për tonë. Çmimet e sotme në tregun ndërkombëtar janë të njëjta me çmimet e muajit prill, kur në Tiranë çmimi i eurodiezelit u rrit në 153 lekë për litër.

Çmimi i naftës bruto në tregun ndërkombëtar ra më tej gjatë javës së kaluar deri në 115 dollarë për fuçi.

Tregu shqiptar

Në Shqipëri u konsumuan gjatë vitit të kaluar rreth 550 mijë tonë naftë dhe benzinë, nga të cilat, 413 mijë u importuan, ndërsa pjesa tjetër u prodhua në vend. Për shkak se është treg i vogël, numri i anijeve me karburant që vijnë në portet shqiptare është gjithashtu shumë i vogël, gjë që sjell një pasqyrim të vakët të çmimeve të tregut ndërkombëtar. Nafta e importuar në Shqipëri taksohet fillimisht në doganë mbi çmimet e referencës që përcaktohen nga administrata doganore. Një vendim i muajit të kaluar, ka rritur taksimin për naftën me 1 deri në 2 lekë për litër, gjë që është pasqyruar edhe në çmimin final që paguajnë konsumatorët.