Bisedojnë për Sirinë

Koordinatori diplomatik i sekretares amerikane të Shtetit, Hillary Clinton, takon në Moskë zyrtarët rusë, në përpjekje të gjetjes së një gjuhe të përbashkët si përgjigje ndaj krizës në Siri.

Koordinatori special për Lindjen e Mesme, Frederick Hoff, u tha se do të zhvillojë bisedime në Ministrinë e Jashtme të Rusisë.

Para takimit, Ministria e Jashtme e Rusisë njoftoi se ajo është në kontakte të vazhdueshme me Washingtonin zyrtar lidhur me situatën në Siri.

Rusia, një aleate kjo e vjetër e regjimit sirian, ka kohë që bashkë me Kinën po bllokon ndërmarrjen e çfarëdo lloj masash ndaj Sirisë në Këshillin e Sigurimit të OKB’së.

Sekretarja e shtetit, Hillary Clinton, gjatë javës ka ripërsëritur apelet për largimin nga pushteti të presidentit të Sirisë, Bashar al-Assad.

Siria ka kohë që është përfshirë nga protestat dhe konflikti i armatosur kundër regjimit në Damask. Sipas të dhënave të OKB’së, që nga marsi i vitit të kaluar atje janë vrarë të paktën 9,000 persona.