Bletërritësi Vero Zika, një jetë mes koshereve – Bletaria, nga pasioni në biznes të suksesshëm
Vero Zika, 79-vjeçari nga Tepelena, i ka kushtuar mbi gjysmë shekulli bletarisë, një pasion që e nisi në vitin 1975 dhe që me kalimin e viteve e ktheu në një aktivitet të mirëfilltë.
Fillimet e tij ishin të thjeshta, por përkushtimi dhe dashuria për këtë zanat e çuan në zgjerimin e prodhimit, duke arritur deri në 150 koshere në vitin 2000.
“Në vitin 1975 kam qenë në një majë mali. Atje kam filluar me bletët. I kisha pasion. Me prishjen e sistemit kam punuar me një furgon për tregti. E lashë atë punë dhe bleva rreth 150 koshere, duke i shtuar,” shprehet bletërritësi.
Për të, kujdesi ndaj bletëve nuk është thjesht një punë, por një mënyrë jetese që kërkon durim dhe përkushtim të vazhdueshëm.
Çdo ditë, ai i dedikon orë të tëra vëzhgimit dhe mirëmbajtjes së koshereve.
“Unë e kam biznes këtë, sepse kam mbajtur familjen me to. Tregtojmë në Tiranë, Lushnjë, Vlorë dhe në malet e Elbasanit,” thotë z. Zika.
Sot, puna e tij është kthyer në një biznes fitimprurës, por mbi të gjitha mbetet një pasion që nuk njeh moshë.
Për Vero Zikën, bletaria është më shumë se një profesion: është trashëgimia që ai dëshiron të lërë pas për brezat e ardhshëm.
/rtsh.al/