Blinken: Kufizojmë vizat e hyrjes në SHBA për ekstremistët në Bregun Perëndimor

Sekretari amerikan i Shtetit Antony Blinken bëri të ditur ditën e sotme politikën e re për të parandaluar ardhjen në Shtetet e Bashkuara të kolonëve ekstremistë izraelitë përgjegjës për dhunën në Bregun Perëndimor.

“Sot, Departamenti i Shtetit po zbaton një politikë të re të kufizimit të vizave që synon individët që besohet se kanë qenë të përfshirë në minimin e paqes, sigurisë ose stabilitetit në Bregun Perëndimor, duke përfshirë kryerjen e akteve të dhunës ose marrjen e veprimeve të tjera që kufizojnë në mënyrë të padrejtë aksesin e civilëve në shërbimet thelbësore dhe nevojat themelore”, tha Blinken në një deklaratë për mediat.

Blinken theksoi gjithashtu se “anëtarët e afërt të familjes së personave të tillë mund t’i nënshtrohen këtyre kufizimeve”

Departamenti i Shtetit do të jetë në gjendje të zbatojë politikën si për izraelitët ashtu edhe për palestinezët që janë përgjegjës për sulmet në Bregun Perëndimor.

Blinken nuk përmendi asnjë individ që do t’i nënshtrohej kufizimeve të vizave, as nuk tha se sa do të përfshiheshin në këstin fillestar të kufizimeve.

Zyrtarët e administratës kanë sinjalizuar për javë të tëra se do të ndërmarrin veprime të tilla pasi dhuna në Bregun Perëndimor është intensifikuar pas sulmit të Hamasit të 7 tetorit.

Në angazhimet e tij me zyrtarët izraelitë që nga ai sulm, Blinken i ka bërë thirrje qeverisë së Netanyahu të bëjë më shumë për t’i mbajtur përgjegjës kolonët për dhunën.

“Siç ka thënë vazhdimisht Presidenti Biden, ato sulme janë të papranueshme. Javën e kaluar në Izrael, e bëra të qartë se Shtetet e Bashkuara janë të gatshme të ndërmarrin veprime duke përdorur autoritetet tona”, përsëriti diplomati i lartë amerikan në deklaratën e tij të martën.

“Ne do të vazhdojmë të kërkojmë përgjegjësi për të gjitha aktet e dhunës kundër civilëve në Bregun Perëndimor, pavarësisht nga autori apo viktima”, tha Blinken.

Blinken tha se SHBA do të vazhdojë të angazhohet me udhëheqjen izraelite për të “bërë të qartë se Izraeli duhet të marrë masa shtesë për të mbrojtur civilët palestinezë nga sulmet ekstremiste”.

Sekretari i Shtetit vuri në dukje se SHBA do të vazhdojë të “angazhojë Autoritetin Palestinez për të bërë të qartë se duhet të bëjë më shumë për të frenuar sulmet palestineze kundër izraelitëve” tha ai, duke vënë në dukje se liderët në Izrael dhe ata me Autoritetin Palestinez “kanë përgjegjësinë për të  ruajtur stabilitetin në Bregun Perëndimor. Paqëndrueshmëria në Bregun Perëndimor dëmton popullin izraelit dhe palestinez dhe kërcënon interesat e sigurisë kombëtare të Izraelit. Ata që janë përgjegjës për të duhet të mbajnë përgjegjësi”.

/rtsh.al/