Bllokada në Gjirin e Hormuzit, Trump kërcënon: Nëse anijet e shkelin do të eliminohen si ato të drogës
Ushtria amerikane nisi mesditën e sotme bllokadën në Gjirin e Omanit dhe në Detin Arabik, në lindje të Ngushticës së Hormuzit, e cila do të vlejë për të gjithë trafikun detar, pavarësisht flamurit, ka njoftuar United States Central Command në një njoftim për marinarët, sipas Reuters.
Në një shënim për detarët, Komanda Qendrore e SHBA-së tha se do të zbatonte një bllokadë në Gjirin e Omanit dhe Detin Arabik në lindje të Ngushticës së Hormuzit nga ora 15:00 sipas kohës së Mbretërisë së Bashkuar sot.
Bllokada do të zbatohet për të gjithë trafikun pavarësisht flamurit, tha ajo.
“Çdo anije që hyn ose largohet nga zona e bllokuar pa autorizim i nënshtrohet përgjimit, devijimit dhe kapjes. Bllokada nuk do të pengojë kalimin neutral të tranzitit përmes Ngushticës së Hormuzit për në ose nga destinacione jo-iraniane”, thuhet në deklaratë.
Ndërkohë nuk kanë munguar kërcënimet nga Presidenti Donald Trump.
“Nëse ndonjë nga ‘anijet e shpejta’ i afrohet sadopak bllokadës sonë, ajo do të eliminohet menjëherë”.
Kështu është shprehur Trump në një tjetër reagim në rrjetin e tij social Truth, duke theksuar se do të përdorë të njëjtën metodë eliminimi si me tregtarët e drogës me anijet në det.
Trump pretendoi gjithashtu se marina iraniane është rëndë e goditur, ndërsa paralajmëroi se edhe anijet e vogla të sulmit nuk do të tolerohen nëse afrohen pranë zonave të kontrolluara.
“Marina e Iranit është në fund të detit, plotësisht e shkatërruar – 158 anije. Ajo që nuk kemi goditur është numri i tyre i vogël i atyre që ata i quajnë “anije sulmi të shpejtë”, sepse nuk i konsideronim shumë kërcënim. Paralajmërim: Nëse ndonjë nga këto anije i afrohet bllokadës sonë, ato do të eliminohen menjëherë, duke përdorur të njëjtin sistem vrasjeje që përdorim kundër tregtarëve të drogës në anije në det. Është i shpejtë dhe brutal. PS 98.2% e drogës që hyn në SHBA nga oqeani ose deti janë ndaluar! Faleminderit për vëmendjen tuaj ndaj kësaj çështjeje”.