Borg Olivier: Dialogu në favor të Serbisë

Dialogu mes Serbisë dhe Kosovës, i ciki ka mbushur një vit prej se ka filluar me ndërmjetësimin e Bashkimit Evropian në Bruksel, është zhvilluar për të ndihmuar Serbinë dhe në këtë rast ka dëmtuar Kosovën, vlerëson Alexander Borg Olivier.

Oliver, i cili vepron në Kosovë që nga tetori i vitit 2000, në një intervistë për “Zërin”, sqaron se ka qenë pjesë e shumicës së proceseve në Kosovën e pasluftës dhe gjërat sipas tij, nuk ishin menduar se do të jenë ashtu siç janë sot.

Njëri nga përpiluesit e Kornizës kushtetuese të Kosovës, si pjesë e stafit të UNMIK-ut dhe më pas këshilltar te kryeministri Hashim Thaçi, thotë se dialogu në Bruksel është kryekëput politik dhe jo siç ka pretenduar Prishtina zyrtare se po ulet me Serbinë në bisedime për të zhvilluar dialog teknik.

Borg Olivier e cilëson Serbinë në avantazh karshi Kosovës. Ai thotë se pala kosovare është ajo e cila qysh në fillim ka pranuar presionin nga të huajt dhe ka pranuar gjëra të cilat nuk është dashur të pranohen.

“Unë mendoj se dialogu i është imponuar Kosovës dhe gjithmonë kam menduar se nëse do të ketë dialog, ai dialog nuk duhet të jetë politik dhe për çështje politike. Dhe na pozicioni i Kosovës është dashur të ketë qëndrim të qartë se nuk do të hyjmë në dialog politik dhe kur ulemi në tavolinë, do të ulemi të barabartë. Mendoj se Kosova nuk ka qenë shumë e gatshme që të hyjë në dialog, por ka pasur presione”, vlerëson Borg Olivier, i cili në Prishtinë, tashmë ushtron pozitën e avokatit të licencuar në Odën e Avokatëve të Kosovës.