Britania shmang reçesionin e trefishtë
Ekonomia britanike ka shmangur rënien sërish në reçesion. Zyra Kombëtare e Statistikave deklaroi se vlerësimet e saj paraprake për GDP-në tregojnë se ekonomia u rrit me 0.3 për qind në tremujorin e parë të vitit.
Të dhënat tregojnë se ekonomia shmangu dy tremujorë rresht kontraktimin, siç njihet përkufizimi i reçesionit. Më parë ekzistonte frika se Mbretëria e Bashkuar do të hynte në reçesionin e tretë në pesë vjet, i njohur ndryshe si reçesioni i trefishtë.
Ekonomistët thonë se lajmi pritet tu japë një nxitje të vogël psikologjike konsumatorëve dhe bizneseve, por pamja e jashtme e ekonomisë mbetet po e njëjta.
Ekonomia britanike ka përjetuar një seri lëkundjesh sizmike që kur kriza financiare goditi mbarë globin në vitin 2008, e shoqëruar me ritme të ulëta rritjeje dhe tkurrje.
Rritja e dobët ka bërë që agjencitë ndërkombëtare të kreditimit të ulin vlerësimin maksimal AAA për Britaninë.
Duke komentuar shifrat, sekretari financiar i opozitës, Chris Leslie deklaroi se rritja nuk është aq e mirë sa duhet. Pas tre vitesh lëkundje, ne duhet të shohim prova vendimtare se ekonomia është në rimëkëmbje e sipër, tha Leslie.
Qeveria insiston se masat anti-krizë janë jetike për të ulur borxhin dhe për të garantuar një rritje afatgjatë.