CEZ e zhytur ne borxhe
Sipas gazetës ‘Shqip’, nuk kanë mjaftuar metodat e reja të vjeljes së faturave, madje as forca fizike e grupit Task-Force për të bindur debitorët të paguajnë energjinë elektrike të faturuar.
“Borxhi total që na është krijuar që nga 1 janari 2007 llogaritet në rreth 32 miliardë lekë, nga të cilët 5 miliardë janë fatura të papaguara nga institucione publike, buxhetore ose jobuxhetare”, theksoi Alesh Konrad, drejtori i shitjeve në CEZ Shpërndarje.
Kompania CEZ e bleu OSSH në maj të vitit 2009, për 102 milionë euro dhe me një plan investimi për më shumë se 300 milionë euro për një periudhë kohe 4-vjeçare. Planet paraprake ishin ambicioze, por realiteti shqiptar ndryshoi strategjinë e kompanisë, e cila aktualisht është kthyer në qendër të akuzave si nga ana politikës ashtu dhe të opinionit publik.
“Edhe pse po punojmë shumë dhe po përdorim të gjitha mjetet e mundshme për të arkëtuar, nga ndërprerjet dhe deri çuarjen në gjyq të atyre që nuk paguajnë ende, arkëtimet janë të ulëta. Kjo performancë e dobët po ndikon edhe në shpejtësinë e investimeve tona për përmirësimin e rrjetit”, është shprehur Konrad.
Sipas të dhënave zyrtare, deri në fund të vitit 2006, borxhi i krijuar nga familjarët për mospagimin e faturave të energjisë llogaritej në rreth 38 miliardë lekë. Ritmi i borxheve është rritur që nga 2007 kur shpërndarja u nda nga prodhimi për t’u privatizuar më pas.
Qeveria shleu vitin e kaluar rreth 2.2 miliardë lekë borxhe të krijuar nga drejtoritë e ujësjellësve për vite të tëra, por situata vetëm sa ndryshoi provizorisht në raportin mes CEZ dhe KESH, pasi në fillim të këtij viti gjendja me debitorët pësoi përkeqësim.