Connery refuzon një rol me fitim shumëmilionësh
Roli i Gandalf në trilogjinë e Peter Jacksonit, i cili është bërë sipas romanit të J.R.R.Tolkien, i takoi pastaj Ian McKellen, edhe pse Conneryt i ishin ofruar gjashtë milionë dollarë për film. Conneryt i ishte ofruar edhe 15-përqindëshi nga profiti i trilogjisë pas shfaqjes në kinematë anembanë botës. Aktori 82-vjeçar nuk e pranoi rolin, sepse nuk e kishte kuptuar.
"Kam lexuar librin. Kam lexuar skenarin. Shikova filmin. Dhe akoma nuk e kuptoj. Ian McKellen, mendoj unë, është i shkëlqyeshëm", tha Connery.
Ndërkohë, McKellen, i cili përsëriti rolin e magjistarit në filmin "Hobbit", tha se ishte aq shumë i frustruar me punën dhe ekipin e efekteve speciale, sa që ka qarë gjatë xhirimeve.
Premiera botërore e pjesës së parë të trilogjisë, "Hobbit" është planifikuar të jepet më 28 nëntor në Wellington të Zelandës së Re. Ndërsa nëpër kinematë botërore do të shfaqet në muajin dhjetor.