Departamenti i Drejtësisë në SHBA: Trump mund të ketë fshehur të tjera dokumente të klasifikuara
Ish-presidenti amerikan Donald Trump mund të ketë fshehur të tjera dokumente të klasifikuara në pronën e tij në Mar-a-Lago. Sipas Departamentit të Drejtësisë, ka gjasa se u bënë përpjekje për të penguar hetimin e qeverisë, gjatë kontrollit të FBI. Ata pretendojnë se agjentët ishin “të ndaluar në mënyrë eksplicite” të kontrollonin një dhomë magazinimi në rezidencën Trump në Mar-a-Lago. Për këtë arsye ka dyshime se dokumente të tjera me informacione sekrete mund të jenë fshehur.
FBI ishte në gjendje të rikuperonte një numër dokumentesh të klasifikuara që ekipi i Trump nuk i kishte dorëzuar, pavarësisht kërkesave të mëparshme.
Duke përshkruar më tej kontrollin e qershorit, në dosje thuhej: “Megjithatë, në mënyrë kritike, këshilltari i ish-presidentit e ndaloi në mënyrë eksplicite personelin e qeverisë që të hapte ose të shikonte brenda ndonjë prej kutive që mbetën në dhomën e magazinimit, duke mos i dhënë asnjë mundësi qeverisë të konfirmonte se nuk kishte dokumente me shenja klasifikimi të mbetura”.
Pas vizitës së qershorit, ekipet e FBI kontrolluan sërish pronën e Trump në gusht. Presidentët amerikanë duhet t’i transferojnë të gjitha dokumentet dhe emailet e tyre në një agjenci qeveritare të quajtur Arkivi Kombëtar dhe FBI po heton nëse Trump i ka trajtuar në mënyrë të pahijshme të dhënat duke i çuar ato nga Shtëpia e Bardhë në Mar-a-Lago pasi u largua nga detyra në janar 2021./ BBC
/rtsh.al/