Dilemat e shkurtimit të buxhetit. Shehu: Na duhet konsensus për të rritur nivelin vjetor të borxhit

Qeveria duhet të bëjë kujdes në rishikimin e buxhetit, sidomos në fazën kur mendohet se mund të shkurtohen një pjesë e mirë e shpenzimeve publike të cilat gjenerojnë të ardhura për biznesin. Sipas deputetëve të mazhorancës, e vetmja rrugë që mbetet për të nxitur ekonominë, është konsensusi për rritjen e nivelit të borxhit, raporton Vizion Plus.

Është e vërtetë që të ardhurat kanë shënuar një nivel mjaft të ulët krahasuar me vitet e fundit dhe që ekonomia është në një situatë të vështirë, megjithatë duhet që me konsensus politik të bëjmë marrëveshje për të rritur me 1% nivelin vjetor të borxhit, shprehet Sherefedin Shehu, deputet i Partisë Demokratike.

Nga ana tjetër, për ekspertët kontabël ulja e të ardhurave në buxhet nuk lidhet vetëm me situatën e vështirë ekonomike që po përjeton biznesi dhe konsumatori, por edhe me performancën e dobët nga ana e financave për mbledhjen e taksave.

Qeveria duhet që të mbledhë urgjent një këshill ekonomik dhe më pas të marrë vendime. Gjithashtu duhet një performancë më e lartë në realizimin e të ardhurave dhe të ulet evazioni fiskal, sepse rregullat fiskale nuk po funksionojnë, mendon Agim Binaj, ekspert kontabel. Në gjendjen e ndodhur, qeveria shqiptare është vënë përpara një zgjedhjeje të vështirë se sa para i duhet që të shkurtojë në buxhet dhe se në cilët sektorë. Megjithatë përcaktuese mbeten të ardhurat që do të vijnë nga privatizimet në muajin shtator.