Disidenti kinez kërkon të lërë vendin

Disidenti kinez Chen Guangcheng ka deklaruar se ka frikë për jetën e tij dhe se dëshiron të largohet nga Kina, disa orë pasi braktisi selinë e ambasadës amerikane në Pekin.

Chen tha se u largua nga ambasada amerikane ku ishte strehuar pasi autoritetet kineze kërcënuan anëtarët e familjes së tij.

Por ambasadori amerikan Gary Locke deklaroi se zotit Chen nuk i ishte bërë kurrë presion për t`u larguar.

Çështja vazhdon të mbulojë vizitën dyditore të sekretares amerikane të Shtetit, Hillary Clinton, që është përqendruar tek marrëdhëniet tregtare dhe sigurinë.

Më herët zonja Clinton shprehu mbështetjen e saj për zotin Chen, i cili është mbajtur në arrest shtëpie për pothuajse dy vjet. Por gjatë bisedimeve të zhvilluara, ajo nuk e ka përmendur emrin e tij.

“Shtetet e Bashkuara besojnë se asnjë shtet nuk mund të legjitimojë të drejtat universale që i takojnë çdo njeriu, apo të ndëshkojë ata që i ushtrojnë ato”, tha shefja e diplomacisë amerikane në hapjen e sesionit vjetor të Dialogut Strategjiko-ekonomik mes SHBA dhe Kinës.

“Një Kinë që mbron të drejtat e të gjithë qytetarëve të saj do të jetë një partner më i fortë dhe më prosperues për Shtetet e Bashkuara”, u shpreh Clinton.

Kina dhe Amerika mund të mos i zgjidhin dot të gjitha problemet e botës, vijoi ajo, por me bashkëpunimin mes tyre pa dyshim që çdo problem mund të zgjidhet.

Ndërsa presidenti kinez Hu Jintao, duke folur në hapjen e bisedimeve, tha se është e pamundur për Kinën dhe Shtetet e Bashkuara që të shohin “sy për sy çdo problem”.