Dogana e Durrësit bllokon sasi mielli jashtë afateve të përdorimit
TIRANË, 17 shkurt/ATSH/ Dogana e Durrësit njoftoi sot se ka bllokuar një sasi mielli jashtë afateve të përdorimit.
Gjatë kontrollit fizik në ambientet e një subjekti tregtar, i pajisur me autorizim për përdorimin e Regjimit të Përpunimit Aktiv, punonjësit e doganës kanë bllokuar mallra që u kishte kaluar afati i përdorimit, referuar datës së skadencës.
Nga punonjësit e doganës është bllokuar sasia 2,500 kg miell orizi, me datë skadence 1 prill 2025 dhe sasia 5150 kg miell për pica, me datë skadence 7 prill 2025.
Dogana e Durrësit ka nisur procedurat, në bashkëpunim me strukturat e Autoritetit Kombëtar të Ushqimit, në parashikim të kompetencave përkatëse, deri në asgjësimin e mallit.
Drejtoria e Përgjithshme e Doganave shpreh angazhimin maksimal për zbatimin e ligjshmërisë dhe nxit operatorët ekonomikë për respektimin e detyrimeve për garantimin e sigurisë dhe mbrojtjes së shtetasve.
/m.m/r.e/a.f/