Drews nuk e ka ndërmend të takohet me Bogdanoviqin

Komandanti i KFOR-it, Erhard Drews nuk do të takohet me ministrin e qeverisë së Serbisë për Kosovë, Goran Bogdanoviq, pasi që KFOR-i lidhjet i mban vetëm me nëpërmjet komisionit të përbashkët - përgjegjës për zbatimin e marrëveshjes tekniko -ushtarake, kështu i ka deklaruar KFOR-i, agjencisë serbe të lajmeve, Beta.

Zëdhënësi i KFOR-it, Uwe Nowicki i ka deklaruar kësaj agjencie, se KFOR-i është i informuar

për kërkesën e ministrit serb, Goran Bogdanoviq që takohet me komandantin e KFOR-it, Erhard Drews.

“Komandanti i KFOR-it nuk ka ndërmend të marrë pjesë në një takim të tillë, sepse KFOR-i, me zyrtarët serbë mban lidhje vetëm përmes komisionit të posaçëm të përbashkët, përgjegjës për zbatimin e marrëveshjes tekniko -ushtarake," ka thënë shkurt, Nowicki.

Nowicki ka sqarua se Komisioni ushtarako-teknike përbëhet nga përfaqësues të KFOR-it dhe ushtrisë serbe.

Bogdanoviq kishte kërkuar një takim me gjeneralin Drews dhe Shefin e EULEX-it Xavier de Marnhac për të biseduar lidhur me “çështjen e grupeve të armatosura në veri të Kosovës dhe mënjanimit të shkallëzimit të konfliktit”, i është thënë dje agjencisë Beta në ministrinë që drejton Bogdanoviq.