Dell: Ende ka punë në ndërtimin e Kosovës shumë-etnike

Edhe pse përfundimi i mbikëqyrjes së pavarësisë do të jetë një ngjarje tepër e rëndësishme, kjo nuk do të thotë që Kosova do të kryejë punën në integrimin e plotë dhe në mbrojtjen e pakicave të saj.

Kështu tha të shtunën ambasadori i Shteteve të Bashkuara të Amerikës në Kosovë, Christopher Dell, në konferencën vjetore të Rrjetit Strategjik Aksional, Kosova, që u mbajt në komunën e Graçanicës, raporton REL.

Dell tha se “ne çdo ditë shohim se ende ka shumë punë për të bërë në ndërtimin e një Kosove tolerante shumetnike dhe demokratike”.

“Të gjitha institucionet në Kosovë duhet të shprehin qartë përkushtimin e tyre të përbashkët ndaj bashkësive pakicë dhe të tregojnë se Kosova është me të vërtetë e të gjithëve, njerëzve të ndryshëm që jetojnë këtu”, tha Dell.

Dell kritikoi institucionet e Kosovës, duke thënë se nuk kanë bërë mjaft për respektimin dhe promovimin e plotë të të drejtave dhe interesave të bashkësive pakicë.

“Ligji për gjuhët i Kosovës është njëri nga më përparimtarët në Evropë, por ai nuk zbatohet në masë të mjaftueshme”, u shpreh Dell.

Ambasadori amerikan foli edhe për miratimin e ligjeve për Qendrën Historike të Prizrenit dhe për Hoçën e Madhe. Ai për këto ligje tha se “janë ligje të mira për tërë Kosovën.

“Për fat të keq, debati për këto ligje që u zhvillua në Kuvend tregon që Kosova ende duhet të punojë në forcimin e themeleve të një shoqërie tolerante dhe shumë-etnike”, theksoi Dell.