Duka rizgjidhet në krye të FSHF-së për katër vitet e ardhshme

TIRANË, 16 shkurt/ATSH/ Asambleja e Përgjithshme Zgjedhore e Federatës Shqiptare të Futbollit (FShF) rikonfirmoi sot besimin e plotë ndaj drejtimit aktual duke zgjedhur Armand Dukën president për një mandat të ri katërvjeçar.

Vendimi u mor me votë unanime nga të gjithë anëtarët me të drejtë vote, një shprehje e qartë e mbështetjes dhe unitetit brenda komunitetit të futbollit shqiptar.

Procesi u zhvillua në ambientet e “Shtëpisë së Futbollit” ku delegatët vlerësuan lidershipin, vizionin dhe kontributin e presidentit Duka në zhvillimin e futbollit në vend, si në aspektin sportiv, ashtu edhe në atë organizativ dhe institucional.

Ky mandat i ri jo vetëm konfirmon lidershipin e presidentit Duka, por edhe angazhimin e FShF për të garantuar zhvillim të qëndrueshëm, promovim të talenteve të rinj dhe rritje të standardeve të futbollit shqiptar në nivel kombëtar dhe ndërkombëtar.

Duka mban postin e presidentit të FShF-së që prej vitit 2002.

/a.f/r.e/