Edi Rama: Çfarë “Rilindjeje”, synimi “Të mbetemi gjallë”

Pas “Përtej të majtës e të djathtës”, vdes edhe platforma e dytë elektorale e Ramës, ajo e Rilindjes. I sigurt se po shkon drejt një falimentimi zgjedhor, mesazhi i djeshëm për deputetët e tij ka qenë krejt i zhveshur nga etika e nga morali. Ai u ka thënë hapur socialistëve se s’është momenti i fitores, por i mbijetesës, i të mbeturit gjallë në politikë, prandaj edhe ishte i detyruar të bashkohej me kundërshtarin e tij më të flaktë në të majtë, pa marrë parasysh sa do t’i kushtonte kjo zgjedhje në elektorat

Edi Rama është në kufijtë e mbijetesës së tij personale në politikë. Pavarësisht se flet në emër të “të interesit kombëtar dhe publik, si edhe në emër të interesit të PS-së”, hallin e tij, që të gjithë ia dinë dhe ia njohin, ai nuk e fshehu as dje kur artikuloi “unë dua të fitoj për të gjithë ju”.
Prej rreth 8 vjetësh në politikën aktive, kohë që korrespondon edhe me katapultimin e tij në krye të PS-së, Edi Rama vetëm shijen e fitores nuk ka ndjerë ende..., ndërsa nga ana tjetër është shndërruar në një “degustator” shijesh humbjesh.
Pas “Përtej të majtës e të djathtës”, slogan i cili dukej se katër vjet më parë u sajua vetëm për inat dhe kundër Ilir Metës e LSI-së, katër vjet më pas, as slogani “Rilindje”, nuk ngjiti. I bindur se vdiq ende pa u “rimëkëmbur” edhe platforma e dytë elektorale, ajo e “Rilindjes” së tij, Edi Rama po mundohet, duke u sforcuar shumë, për ekzistencën e tij pas 23 qershorit 2013.
Për këtë nuk njeh më as “din e as imam”, por as parime e as moral.
I sigurt se po shkon drejt një falimentimi zgjedhor, mesazhi i djeshëm për deputetët e tij ka qenë krejt i zhveshur nga etika e nga morali.
Duke folur për kapërcime e trajtime çështjesh, “pa moralizime apolitike”, Edi Rama ishte vetë i ndërgjegjshëm se jo të gjithë do i jepnin të drejtë. Por, kjo nuk e pengoi atë, që të gjithëve, gati sa nuk u lutej, që ai  duhet të fitonte, të paktën një herë të vetme. Dhe këtë fitore, ai tashmë ka krijuar bindjen, se nuk mund ta arrijë pa ndihmën e LSI-së.
Këtë mesazh të rëndësishëm, ëpr fatin e tij personal, ai ua ka përcjellë, duke tentuar edhe tua imponojë hapur socialistëve, sipas të cilit, s’është momenti i fitores, por i mbijetesës, i të mbeturit gjallë në politikë, prandaj edhe ishte i detyruar të bashkohej me kundërshtarin e tij më të flaktë në të majtë...
Për Edi Ramën, nga dje, slogani “Rilindje”, merr një kuptim dhe një “translate” tjetër..., “të mbetemi gjallë”...