Edward Snowden: Nuk do flas edhe sikur rusët të më torturojnë (kurse Putin tregon muskujt)

Për qeverinë amerikane, Edward Snowden është një tradhtar.

Por një ish- senator republikan ka dalë në mbështetje të ish- punonjësit që nxori i pari të dhëna se si agjencitë e qeverisë amerikane spiunojnë njerëzit në mbarë botën.

Ish- senatori Gordon J. Humbphrey i ka dërguar një e-mail Snowden, duke i thënë se ai ka vepruar drejt, por e paralajmëron që të mos nxjerrë asnjë informacion që dëmton spiunët amerikanë.

Ish- senatori thotë se qeveria amerikane po tregon një arrogancë në rritje.

Sipas 72 vjeçarit, qeveria amerikane, në vend që të merret me Snowden, duhet të dënojë ata që keqpërdorin pushtetin dhe të drejtat e miliona njerëzve.

Snowden, që ndodhet në Rusi, i ka kthyer përgjigje duke thënë se ai në asnjë mënyrë nuk do japë informacione që dëmtojnë popullin amerikan.

Të jeni të sigurt se nuk do më detyrojnë as me tortura që të jap informacione që dëmtojnë agjentët dhe popullin amerikan, shkruan ai.

Ndërkohë të martën Snowden ka aplikuar zyrtarisht për qëndrim të përkohshëm në Rusi.

Presidenti i këtij vendi, Vladimir Putin, ka reaguar pas lajmeve se presidenti amerikan, Barack Obama, mund të anulojë vizitën në Moskë në shtator.

Putin thotë se marrëdhëniet bilaterale mes dy vendeve janë shumë më të rëndësishme se grindjet mes shërbimeve speciale.

Snowden jeton në një zonë tranziti në një aeroport, pasi nuk mund të lëvizë nga aty për shkak se nuk ka dokumente udhëtimi.

Rusia thotë se do shqyrtojë kërkesën e tij për azil, duke shtuar se kjo gjë nuk është në dorë të Putinit.

Ndërkohë Putin vazhdon me shfaqjet e forcës, ndërsa sot ka vëzhguar një stërvitje ushtarake, më e madhja që prej mbarimit të Luftës së Ftohtë.

Në total në stërvitje u përfshinë 160 mijë trupa dhe 5 mijë tanke. Në stërvitje morën pjesë edhe 130 avionë ushtarakë dhe dhjetëra anije të flotës së Paqësorit.

Zyrtarët rusë thonë se nuk është një shfaqje force, por analistët thonë se ky është qëllimi./ep