Egnatia-Laçi, “replay” në Kupë

Egnatia – Laçi, ekzaktësisht si një vit më parë, ndeshje kupe për raundin çerekfinal dhe një barazpeshë totale qe mori zgjidhje vetëm nga lotaria e 11-metërshave. Ironi e fatit ose jo, por dy skuadrat do të ndeshen sërish në një ndeshje kupe të vlefshme për raundin çerekfinal ku parashikohet sërish një sfidë e dyfishtë shumë e luftuar. Diferencat në organika janë pothuajse zero ndërsa gjatë këtij sezoni në kampionat Egnatia ka arritur të bëjë mirë dhe fitorja e fundit në Ballsh e ka bërë një nga skuadrat kryesore në garën për një vend në Europë.

Përsa i përket sezonit të kaluar në kupë, ishte Julian Shehu autor i golit të parë dhe Magani barazoi pak minuta më vonë ndërsa në Kurbin 120 minutat u mbyllën me rrjeta të paprekura e më pas Laçi triumfoi 3-2. Bazuar në statistikat e këtij sezoni, Egnatia është superdominuese ndaj bardhezinjve. 3 fitore në po kaq ndeshje, e fundit në 11 shkurt në Kurbin e mbyllur 0-1 ndërsa në dy të tjerat bardhjeshilët kanë fituar pa pësuar asnjë gol.

Deri në këtë pikë të sezonit, Egnatia ka arritur ti shkëpusë 9 pikë vetëm nga Laçi, pothuajse1/4 e pikëve të grumbulluara deri në këtë moment ndërsa nuk e ka nxjerrë asnjëherë topin nga rrjeta përballë kurbinasve. Statistika perfekte për skuadrën e Edlir Tetovës që përballë do të ketë Laçin e uritur për suksese pas tri sfidave rresht pa fitore.