Ekonomia amerikane tkurret me 0.3% në tremujorin e parë, rënia më e madhe që nga viti 2022

Ekonomia amerikane u tkurr me një ritëm vjetor prej 0.3% nga janari deri në mars, rënia e parë në tre vjet. Ajo u ngadalësua nga një rritje e importeve, ndërsa kompanitë në Shtetet e Bashkuara u përpoqën të sillnin mallra të huaja përpara se Presidenti Donald Trump të vendoste tarifa masive .

Kjo shënon një rënie të ndjeshme pas rritjes me një ritëm vjetor prej 2.4% në tremujorin e mëparshëm, megjithëse rënia nuk ishte aq e rëndë sa kishin parashikuar disa analistë.

Ekonomia amerikane sapo pati tremujorin e saj më të keq që nga viti 2022, ndërsa ndryshimet e rëndësishme në politikat e Presidentit Donald Trump po shqetësojnë konsumatorët dhe bizneset.

Rënia u nxit nga ulja e shpenzimeve qeveritare dhe një rritje prej më shumë se 40% e importeve – të cilat llogariten kundër rritjes – ndërsa kompanitë nxituan të shpëtojnë nga tarifat.

Rritja e shpenzimeve të konsumatorëve u ngadalësua gjithashtu nga fundi i vitit të kaluar, me një rritje prej 1.8%, nga 4% në tremujorin e mëparshëm.

Sekretari i Thesarit, Scott Bessent, vetëm dje u bëri thirrje njerëzve të përqendrohen më pak te ndjenja dhe më shumë te të dhënat konkrete, ndërsa përpiqen të vlerësojnë se si po ecën ekonomia.

Ky raport, i cili përqendrohet në një periudhë përpara se të shpalleshin tarifat më të gjera të Presidentit të SHBA-së, Donald Trump, nuk ka gjasa ta sqaroj debatin.

Ky është një ngadalësim i ndjeshëm nga norma prej 2.4% e tremujorit të katërt, dhe shumë më keq se norma prej 0.8% që parashikuan ekonomistët. PBB-ja është e rregulluar për luhatjet sezonale dhe inflacionin. Aksionet amerikane ranë pas publikimit të raportit të PBB-së.

Një rezultat më i keq për rritjen sesa prisnin ekonomistët

Vetëm 24 orë pasi Sekretari i Shtypit i Shtëpisë së Bardhë deklaroi se ekonomia amerikane po ecte me hapa të shkëlqyer, ka prova dramatike se nuk ishte kështu,  madje as përpara të ashtuquajturës Ditë Çlirimi.

Ky është një rezultat më i keq për rritjen ekonomike nga sa prisnin ekonomistët. Një pjesë e dobësisë së tremujorit të parë ishte për shkak të një rritjeje të importeve, pasi shitësit me pakicë grumbulluan mallra përpara se të vinin tarifat – dhe kjo llogaritet si një pengesë për rritjen e PBB-së.

Por, me shpenzimet e konsumatorëve të dobëta, ka shenja të qarta se dëmi ndaj rritjes mund të vazhdojë.

Rënia e ekonomisë u nxit nga një deficit më i gjerë tregtar – një rezultat i blerjeve të shpejta nga amerikanët për të kapërcyer tarifat e Trump – dhe shkurtimeve në shpenzimet qeveritare, sipas një njoftimi.

Importet u rritën ndjeshëm nga -1.9% në tremujorin e katërt në 41.3% në tre muajt e parë të vitit. Ndërkohë, eksportet u regjistruan me një normë prej 1.8%.

Kur importet tejkalojnë eksportet, kjo ul PBB-së dhe kjo ishte padyshim pengesa më e madhe në rritje në tremujorin e parë. Diferenca midis importeve dhe eksporteve i zbriti PBB-së më shumë se çdo rekord tjetër që nga viti 1947.

Këshilltari kryesor i tregtisë i Trump, Peter Navarro, e quajti raportin e PBB-së “printimin më negativ që kam parë ndonjëherë në jetën time”.

“Tregjet duhet të shohin nën sipërfaqe”, tha Navarro të mërkurën në një intervistë për CNBC, duke treguar rritjen e ndjeshme të investimeve vendase tremujorin e kaluar. Megjithatë, pjesa më e madhe e kësaj rritjeje erdhi nga bizneset që rritën inventarët e tyre përpara tarifave, tha Departamenti i Tregtisë.

Ndërsa PBB-ja tkurret, Shtëpia e Bardhë lavdëron arritjet ekonomike

Mbrëmë, për të shënuar festimet e 100 ditëve të Trump në detyrë – administrata Trump publikoi me krenari një deklaratë duke lavdëruar arritjet e saj ekonomike, duke përfshirë investimet nga disa prej firmave, drejtuesit ekzekutivë të të cilave janë në qytet për eventin e presidentit.

Deklarata mburrej me mbi 5 trilion dollarë investime, të cilat pretendon se do të krijojnë mbi 450,000 vende të reja pune dhe do të sjellin një epokë të “prosperitetit amerikan”.

Ndër investimet aktuale dhe të planifikuara të listuara janë 500 miliardë dollarë nga SoftBank me seli në Japoni dhe OpenAI dhe Oracle me seli në SHBA, 500 miliardë dollarë të tjerë nga Apple në prodhim dhe trajnim në SHBA, dhe 500 milionë dollarë nga Nvidia për infrastrukturën e inteligjencës artificiale me seli në SHBA.

Për më tepër, deklaratat e Shtëpisë së Bardhë vunë në dukje investimet e huaja të premtuara nga qeveritë e huaja, duke përfshirë 1.4 trilion dollarë nga Emiratet e Bashkuara Arabe, 1 trilion dollarë nga Japonia dhe 600 miliardë dollarë nga Arabia Saudite. BBC/ CNN

/rtsh.al/