Elbasani, fitore me përmbysje përballë Teutës

Elbasani ka arritur një fitore me përmbysje, 2-1 përballë Teutës në javën e 32-të të “Abissnet Superiore”, në një ndeshje që erdhi për shikuesit në ekranin e RTSH2.

Në pjesën e parë ishte skuadra durrsake që u tregua më dominese në lojë, duke zhbllokuar sfidën me një 11-metërsh të fituar dhe kthyer në gol nga Arifi.

Në pjesën e dytë, Elbasani u tregua më kërkues, duke përfituar dhe nga një tërheqje e skuadrës durrsake. Një 11-metërsh i akorduar me VAR dhe i kthyer në gol nga Diallo vendosi barazpeshën.

Në 10 minutëshin e fundit të sfidës, portieri i durrsakëve, Selmani priti dy herë një 11-metërsh të Diallo, por nuk mund të bënte asgjë në shtesë, me Ze Gomes që shënoi me kokë duke i dhënë fitoren skuadrës së Elbasanit.

Me këtë fitore, verdheblutë ngjiten në kuotën e 59 pikëve, në vend të dytë, një më pak se Vllaznia e vendit të parë. Teuta mbetet në kuotën e 38 pikëve, në vend të 6-të.