“Embargoja” e mishit nga Brazili, mbyllen porositë për sasitë e gjedhit dhe derrit, ngarkesat e fundit deri në dhjetor!

Pas 20 vitesh që shqiptarët konsumojnë mish Brazili 3 shtatori shënon fundin afatit zyrtar të vendosur nga ministria e Bujqësisë te porosive për importin e mishit të gjedhit dhe derrit.

Tregtarët e mishit nga Brazili, pas kësaj date, e kanë të ndaluar të blejnë produkte mishi të dy kategorive të sipërpërmendura.

Ky vendim vjen pas njoftimit të Komisionit Europian më 4 qershor, i cili deklaroi se nuk kishte marrë informacion që garantonte se Brazili kishte zbatuar masat e nevojshme për përdorimin e antibiotikëve që rrisin masën muskulore të kafshëve, por edhe për përdorimin e antibiotikëve që kurojnë në mënyrë të shpejtë kafshët nga sëmundjet, por që rrezikojnë shëndetin e njeriut.

Për këtë arsye, Brazili humbi shenjën “X” për importin e mishit të gjedhit, kuajve, shpendëve, akuakulturës, mjaltit dhe zorrëve në tregun europian.

Ky lajm nuk është mirëpritur nga importuesit shqiptarë të mishit brazilian, i cili u garantonte fitim të madh, pasi blihet lirë.

Shqipëria u pushtua nga mishi brazilian në vitin 2006. Që prej asaj kohe, numri i kërkesave për mish brazilian erdhi duke u rritur. “TCH” informon se ka arritur të sigurojë sasinë e mishit brazilian të importuar në tre vitet e fundit.

Saktësisht, në vitin 2024 janë shkarkuar në doganë 512 ngarkesa, ku shifra e peshës shkon afërsisht në 13 mijë tonë, nga të cilat 6 mijë tonë janë mish pule, 691 tonë mish gjedhi dhe 6 mijë tonë mish derri.

Ndërsa në vitin 2025, shqiptarët kanë konsumuar afërsisht 12 mijë tonë mish brazilian. Sasinë më të madhe e zë mishi i pulës, afërsisht 6,7 mijë tonë. Ndërsa më pak është importuar mish gjedhi, 571 tonë, kurse mishi i derrit i importuar shkon në 5 mijë tonë. Numri total i ngarkesave shkon në 475.

Kurse për vitin 2026, nga muaji janar-korrik, janë realizuar 344 ngarkesa, ku sasia e mishit të importuar shkon në 9 mijë tonë. Nga të cilat, 5 mijë tonë janë mish pule, 272 tonë mish gjedhi, kurse mish derri është importuar 3 600 tonë.

Sasia e mishit brazilian në vitin 2026 pritet të jetë më e lartë se vitet e tjera. Njoftimi i Komisionit Europian për bllokimin e këtij mishi të lirë ka ndikuar që bizneset e këtij produkti të shtojnë sasinë e porosive. Me shumë gjasa, ngarkesa e fundit e mishit brazilian të gjedhit dhe derrit pritet të hyjë deri në muajin dhjetor, për shkak të distancës së largët që ka vendi ynë me Brazilin.